परीक्षणको दायरा व्यापक बनाउन काँग्रेसको आग्रह

काठमाडौं । नेपाली कांग्रेसले सम्भावित संक्रमितहरुलाई कडाइका साथ सीमामा प्रवेश रोक्न र समुदायमा संक्रमण गइसकेको अवस्थामा त्यस्ता ठाउँहरुको सघन अनुगमन गरी परीक्षणको दायरा व्यापक बनाउन आग्रह गरेको छ ।

नेपाली कांग्रेस कोभिड—१९ अनुगमन समितिले आज एक विज्ञप्ति जारी गरी लकडाउन खोलिए पनि नेपालको आर्थिक सामाजिक क्षेत्र पूर्ण रुपमा सुचारु हुने अवस्था नभएकाले शिक्षा तथा अर्थतन्त्रका क्षेत्रहरुको जोखिम न्यून गर्न र देशले पूर्ण लकडाउन धान्न नसक्ने हुनाले संक्रमित ठाउँहरुमा लक्षित लकडाउन र आइसोलेसनको व्यवस्था गर्न सरकारलाई आग्रह गरेको हो ।

यसैगरी खाडी देशहरुमा रोजगार गुमाई भीसा अवधि पनि सकिएकाहरुलाई तत्काल नियमित उडान गरी सस्तो दरमा देश फिर्ता गर्नेलगायतका मागहरुको पनि सम्बोधन गर्न सरकारलाई आग्रह गरीएको छ ।

विज्ञप्तिमा संक्रमण नियन्त्रण गर्न सकिने परिस्थिति हुँदाहुँदै पनि सरकारको उदासिनताका कारण देशभरि कोभिड—१९ संक्रमण फैलदै गएको आरोप लगाइएको छ ।

Leave a Reply

Your email address will not be published. Required fields are marked *