येँ मनपाया पाठ्यसफू विमोचन


येँ / येँ महानगरपालिकां कक्षा १ निसें ८ तक यागु पाठ्यसफू ‘येँ देय् म्हसीके’ सार्वजनिक यात । मनपां थ्वहे दँ निसें फुक्कं स्कूलय् थ्व पाठ्यसफू ब्वंकेगु तयारी यानाच्वंगु दु । मनपाया मातहत लाःगु फुक्कं स्कूलय् ब्वंकेत्यंगु स्थानीय पाठ्यसफू म्हिगः छगू ज्याझ्वःया दथुइ विमोचन जूगु खः ।


थनया राष्ट्रिय सभागृहय् जूगु छगू ज्याझ्वलय् शिक्षा, विज्ञान तथा प्रविधि मन्त्री कृष्णगोपाल श्रेष्ठ लिसें येँ मनपाया मेयर विद्यासुन्दर शाक्य, उपमेयर हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवालीपिंसं मरिकसिं सफू लिकयाः विमोचन यानादीगु खः ।


स्थानीय तगिमय् १ निसें ८ कक्षा तक ब्वंकीगु खःसां म्हिगःया ज्याझ्वलय् १ निसें ४ तगिं तकया सफू विमोचन याःगु खः । आः ५ निसें ८ तगिं तकया सफू याकनं पिदनीगु खँ धाःगु दु ।


सफू विमोचन ज्याझ्वलय् न्ववासें शिक्षा मन्त्री श्रेष्ठं येँ मनपां नेपालभाषाया पाठ्यसफू विमोचन याःगु थौंया न्हि ऐतिहासिक न्हि खः धयादिल । वय्कलं मनपाया थ्व पलाःयात सुभाय् देछासें आः देय्या मेमेगु स्थानीय निकायतय्सं नं थुकथं हे स्थानीय भासं स्थानीय पाठ्यसफू ब्वंकेमाःगु खँय् बः बियादिल ।

वय्कलं येँ मनपां नेपालभाषाया माध्यमं सफू ब्वंकेगु ज्या याःगु कारणं आः नेपालभाषा ब्वनातःपिं मनूतय् लागिं रोजगारीया छगू अवसर खुले जूगु बिचाः नं तयादिल ।


येँ मनपाया मेयर विद्यासुन्दर शाक्यं थ्व पाठ्यसफूपाखें नेपाली जनतायात थःगु शहर व थःगु देय् म्हसीकेत ग्वाहालि याइगु खँ कनादिल । वय्कलं धयादिल, ‘झी थौंकन्हय् छुं उदाहरण छगू बी माल धाःसा अमेरिकाया उदाहरण बी, जापानया उदाहरण बी, नेपाःया उदाहरण बी मखु । छाय्धाःसां नेपाःया बारे झीसं सि हे मसिउ । थ्व सफुतिं अथे सीके बीगु ज्या याइ ।’


मेयर शाकयं धयादिल, ‘येँय् थौं ७७ जिल्लाया मनूत च्वं वयाच्वंगु खः, उमिसं येँ देय्यात जिगु शहर व थनया भाषायात झीगु भाषा धइगु भावना तयेमाः । अले जक झीसं थ्व देय्या विकास याये फइ ।’


अथे हे ज्याझ्वलय् उपमेयर हरिप्रभा खड्गी श्रेष्ठं नेवाः भाय् नं येँ देय्या छगू सम्पदा हे खः धासें थुकियात बचे यायेगु झी सकसिगु कर्तव्य खः धयादिल ।


येँ मनपा शिक्षा विभागया ग्वसालय् जूगु उगु ज्याझ्वलय् शहरी योजना आयोगया निमित्त उपाध्यक्ष गुजेश्वरी श्रेष्ठ, शिक्षा विभागया प्रमुख रामप्रसाद सुवेदी, पाठ्यक्रम समितिया संयोजक वरुणप्रसाद वैद्य, राजेश्वरमान श्रेष्ठ नापं निजी स्कूलतय् संगठनया प्रतिनिधिपिंसं नं न्ववानादीगु खः ।

Leave a Reply

Your email address will not be published. Required fields are marked *