कीर्तिपुर सिङ्गिङ आइडलका विजेताहरूलाई नगद पुरस्कार हस्तान्तरण

कीर्तिपुर सिङ्गिङ आइडल–११४२ का विजेताहरूले नगद पुरस्कार (चेक) प्राप्त गर्नुभएको छ । केही प्रशासनिक प्रक्रिया पूरा भएपश्चात गत सोमबार उक्त पुरस्कार हस्तान्तरण भएको हो ।

कीर्तिपुर नगरपालिकाका प्रमुख रमेश महर्जन, उप–प्रमुख सरस्वती खड्काले नगर प्रमुखको कार्यकक्षमा विजेताहरूलाई सो चेक हस्तान्तरण गर्नु भएको हो । सो अवसरमा प्रमुख प्रशासकीय अधिकृत कृष्णप्रसाद सापकोटा, लेखा शाखा प्रमुख प्रविणजङ्ग शाही, नगर प्रमुख सचिवालयका विकास महर्जनको उपस्थिति रहेको थियो ।

नेपाल संवत् ११४२ नयाँ वर्षको उपलक्ष्यमा नगरका युवाहरूलाई सांगीतिक क्षेत्रमा आकर्षित गर्ने उद्देश्यले कीर्तिपुर नगरपालिकाले “कीर्तिपुर सिङ्गिङ आइडल–११४२” प्रतियोगिताको आयोजना गरेको थियो । यही पुस १५ गते कीर्तिपुर सिनेप्लेक्समा सम्पन्न कीर्तिपुर सिङ्गिङ आइडल–११४२ को फाइनल प्रतियोगितामा कीर्तिपुर नगरपालिका वडा नं. ४ सल्यानस्थानका प्रशान्त सुवेदी प्रथम, वडा नं. ३ कुतिसाःका अतुल मानन्धर द्वितीय र वडा नं. ५ पांगाका जोन महर्जन तृतीय हुनुभएको थियो ।
त्यतिबेला बिजेताहरूलाई प्रमाण पत्र, ट्रफिका साथै डमि चेक हस्तान्तरण गरिएको थियो । प्रथम, द्वितीय र तृतीय हुनेले क्रमशः नगद रु. ५० हजार, रु.४० हजार र रु.३० हजार प्राप्त गर्नुभएको हो भने उक्त पुरस्कारमा नेपाल सरकारको नियमानुसार २५ प्रतिशत कर कटाएको हो ।

Leave a Reply

Your email address will not be published.

%d bloggers like this: