कोरोना भाइरस (कोभिड–१९) ले महामारीका रुपमा विश्वलाई नै आतङ्कित पारिरहेको छ । हाल कोरोना भाइरसको संक्रमणबाट बच्न देशैभरी लकडाउन जारी नै छ ।

कोरोनाको डरमा दैनिक उपभोग्य वस्तुको खरीद गर्न बजार जानु पर्ने बाध्यता छँदैछ । त्यसमाथि विक्रेता कहाँ हुने अस्वभाविक भीडको चिन्ताले पनि सताईरहेको छ ।

यस्तै, औषधी थोक विक्रेताको हब बन्दै गइरहेको काठमाडौंको टेंगलदेखि छत्रपाटीसम्मको इखापाेखरी सडकखण्डमा दैनिक भीडभाड भइरहन्छ ।

जम्मा २०० मिटर लम्बाइको यो बाटोमा २ सयभन्दा धेरै औषधिका थोकपसलहरु छन् । लकडाउनको बेला औषधि पसलहरू खोल्न पाइने सरकारको नियम छ । अरू पसलभन्दा अलिधेरै समय खोल्न पाइने भएतापनि यो क्षेत्रमा भीडभाड अलि धेरै नै हुने गरेके पाइन्छ ।

समाजिक दुरी कायम गरी विक्री वितरण तथा किनमेल गर्नुपर्नेमा यहाँ यस्तो भएको देखिन्न । स्वतःस्फूर्त रुपमा सामाजिक दुरीमा बस्न हिचकिचाउनेहरुसँग यतिबेला जोगिन मुश्किल भएको छ ।

औषधिको केन्द्र (HUB) बनेको स्थान इखापोखरी (टेंगलदेखि छत्रपाटीसम्म)मा भीडभाड कम गर्न कामपा १७ र १८ वडाका अध्यक्षद्वय नविन मानन्धर र न्हुछेकाजि महर्जनको उपस्थितिमा नेपाल औषधि व्यवसायिक संघको आयोजनामा भएको भेलाले केहि निर्णयहरु बुँदागत पनि गरिएको थियो ।

• औषधिपसलहरु सबै थोक विक्रेता भएको हुँदा थोक विक्रीमात्र गर्ने
• सबै औषधि पसलहरु दिनको ११ बजेदेखि ३ बजेसम्म खोल्न र शनिबार बन्द गर्ने
• औषधि क्रेतहरुले ल्याउने सवारी साधन छुट्टै स्थान वा एकतर्फि मात्र पार्किङ गर्ने
• जथाभावी तवरमा समानहरु बाहिर ननिकाल्ने
• भीडभाडबाट बच्न र बचाउन अनलाइन मार्फत सामान अर्डर गर्ने
• उपरोक्त बुँदाहरु पालना गर्न गराउन एक निरिक्षण तथा अनुगमन टोली गठन गर्ने र आवश्यक परे सो सम्बन्धी कार्य छलफल गरी अगाडि बढाउने

अतिआवश्यक सूचिमा परेको औषधी व्यवसायी पसलमा यस्तो भीडले गर्दा यहाँका बासिन्दा त्रसित भएका छन् । कुनै एक कोरोना संक्रमितबाट यहाँ औषधी लिन आएको खण्डमा यो पुरै बस्ती नै खतराको सूचीमा पर्नेछ ।

कोरोना भाइरसले गर्दा नेपालमा आजसम्म ८ जनाको मृत्यु भएको छ । त्यस्तै १ लाख १३ हजार ७ सय ५७ जना क्वारेन्टिन, १ हजार ५ सय ६९ जना आइसोलेसनमा छन् भने १ हजार ५ सय ७२ संक्रमित मध्ये २ सय २१ जना निको भएर घर फर्किसकेका छन् ।

हाल कोभिड–१९ बाट बच्ने सवैभन्दा प्रभावकारी उपाय भनेको सावुनपानीले कम्तिमा २० सेकेण्ड सम्म मिचि मिचि हात धुनु रहेको छ ।