उज्यालो र सौहार्दको प्रतीक पर्व तिहार अर्थात् यमपञ्चक आजदेखि विधिवत् रूपमा सुरु भएको छ ।

नेपाल पञ्चाङ्ग निर्णायक विकास समितिका अनुसार आज दिउँसो १:२३ बजेपछि कार्तिक कृष्ण त्रयोदशी तिथि लाग्ने भएकाले आज धनतेरस (धनत्रयोदशी) र यमदीपदान मनाइँदैछ । काग तिहार भने आइतबार परेको समितिले जनाएको छ ।

समितिका अध्यक्ष प्रा. शम्भुप्रसाद ढकालका अनुसार आज बेलुकी यमदीपदान सुरु गरी भाइटीका (कात्तिक ६ गते) सम्म निरन्तर गरिन्छ । यमदीपदानले यमलोकको पीडाबाट मुक्ति मिल्ने धार्मिक विश्वास छ ।

यस वर्ष सोमबार कुकुर तिहार र लक्ष्मीपूजा एकैदिन परेको छ । बुधबार गाईगोरु, गोवद्र्धन र आत्म (म्ह) पूजा तथा नयाँ वर्ष नेपाल संवत् ११४६ मनाइनेछ । भाइटीका भने बिहीबार, कात्तिक ६ गते बिहान ११:३९ बजे शुभ साइतमा लगाइने समितिले जनाएको छ ।

तिहार नजिकिँदै गर्दा देशभरका सहरहरू झिलिमिली बत्तीले उज्यालिएका छन् । काठमाडौं उपत्यका दीपावलीको रौनकमा रमाउन थालेको छ । नेपाल प्रहरीले पटाका नपड्काई सभ्य र सुरक्षित तरिकाले पर्व मनाउन सबैलाई आह्वान गरेको छ ।