काठमाडौँ । विश्व सम्पदा सूचीमा सूचिकृत वसन्तपुर दरबार क्षेत्रको मरुसत्तलमा यस वर्ष पनि सामूहिक भाइटीका कार्यक्रम सम्पन्न भएको छ ।

अञ्जली मास्केले २७औँ वर्षदेखि निरन्तर रूपमा सामूहिक भाइटीका लगाउँदै आएकी छन् । उहाँले यस वर्ष २०८ दाजुभाइलाई दीर्घायु र सुस्वास्थ्यको कामना गर्दै टीका लगाइदिनुभएको जानकारी दिइएको छ ।

दिदीबहिनी नभएका दाजुभाइलाई जातपात नहेरी टीका लगाउने परम्परा २०५५ सालदेखि सुरु भएको बताइएको छ । संस्कृतिको संरक्षण र आपसी सद्भावको सन्देश फैलाउन मास्केले यो कार्य निरन्तर रूपमा गर्दै आएकी छन् ।

२०७१ सालसम्म काष्ठमण्डपमा सामूहिक टीका कार्यक्रम सञ्चालन भए पनि २०७२ सालको भूकम्पपछि त्यस ठाउँ भत्किएपछि उहाँले मरुसत्तलमा टीका लगाउन थालेको जानकारी दिइएको छ ।

काष्ठमण्डप पुनःनिर्माण पूरा भए पनि विवादका कारण नखुलेपछि हालसम्म पनि मास्केले मरुसत्तलमै भाइटीका कार्यक्रमलाई निरन्तरता दिइरहेको जनाइएको छ ।