वाशिङ्टन डिसी (अमेरिका) :नेपालका तराई क्षेत्रमा विशेष महत्वसाथ मनाइने छठ पर्व अमेरिकाका विभिन्न राज्यहरूमा नेपाली समुदायद्वारा उल्लासपूर्वक मनाइएको छ। न्यूयोर्क, मेरिल्याण्ड, भर्जिनिया, टेक्सास, क्यालिफोर्निया, पेन्सलभेनिया, ओहायो लगायतका राज्यका मन्दिर तथा विशेष ठाउँमा नेपालीहरूले छठ मनाए।

मेरिल्याण्डको जर्मनटाउनस्थित नेपाल एजुकेशन एण्ड कल्चरल सेन्टरको आयोजनामा भएको छठ पर्वमा नेपाली समुदायको बाक्लो उपस्थिति रह्यो। बिहीबार साँझ सन्ध्याकालमा सूर्यलाई अर्घ दिइएको छ भने आज बिहान उदाउँदो सूर्यलाई अर्घ दिएर पर्वको समापन गरिने आयोजकले जनाएका छन्।

आयोजक मोहन यादवले प्रवासी भूमिमा छठ पर्व जस्तो सांस्कृतिक पर्व मन्दिरमा मनाउन पाउनु खुशीको विषय रहेको बताउनुभयो। उहाँले तीन दिनसम्म उपवास बसेर छठी माताको पूजा गर्दै आएको यस पर्वमा युवा पुस्तालाई पनि सक्रिय सहभागी गराइएको जानकारी दिए।

यादवले थप भन्नुभयो, “हामी अमेरिकामा हाम्रो सनातन धर्मका मूल्य र मान्यता नयाँ पुस्तासम्म पुर्‍याउन प्रयासरत छौँ, ताकि तिनीहरूमा पनि यसको वैज्ञानिक र सांस्कृतिक पक्षप्रति रुचि बढोस्।”