काठमाडौं, १५ साउन २०७८ ।

नेपाःया ऐतिहासिक मरुसतः पुनःनिर्माण याकनं हे ज्या क्वचायेत्यंगु दु ।

पुनः निर्माणया ज्या क्वचायकेत विहीवाः मरु सतलय् गजू छुइगु नितिं गजू दिकेत दयेकातःगुप्यकंलागु व चाकलाःगु सिंयात लसकुस यानाः सतलय् तयेहगु दु ।

थुगु गजू दिकेगु चाकलागु तःचागु सिंयात बाजं सहितं लसकुस यानाः मरु सतलय् तयहःगु खःसा तये न्ह्यः थ्व गजूयात नापसं च्वंगु श्रीखण्डतरुमुल महाविहार सिखंमू बहाः दुने निन्हु तक बज्रयानी तान्त्रिक विधि विधानकथं पूजाआजा याःगु खः ।

पुजाआजाया ज्या क्वचायका श्रावण १४ गते थुगु बहालंनिसें नेपाली सेनाया जवानतय्त क्वबुइकाः मरुसतः दुने तय् हःगु खः ।

थुकथं मरुसतलय् हयेत गजूयात मरुसतःया लिसें सिँल्यं सतः व मरुया परिसर तकं चाःहिका हःगु खः । ऐतिहासिक मरु सतलय् जात्रा याना गजू दिकेगु सिं हःगुलिइ सतलय् दिके धुंकाः सिखंमू बहाःया बज्राचार्य व थीथी बहाःया बज्राचार्यपिं सहित जानाः बज्रयानी तान्त्रिक विधिकथं चचा हालाः गजू दिकेगु सिंया पुजा याःगु खः ।

बौद्ध विद्धान यज्ञमानपति बज्राचार्यजुया नेतृत्वय् थुकथंया पुजाआजा जूगु खःसा थुगु पुजाआजाय् सिखंमू बहाःया गौतम रत्न बज्राचार्य, आनन्दमुनि बज्राचार्य, मणिसंघ विहार ज्याबहाःया गौतम बज्राचार्य, राजेश बज्राचार्य लगायत आपालं बज्राचार्यपिनिगु ब्वति दुगु खः ।

थुगु सतः दयकेत काठमाडौं महानगरपालिकाया आर्थिक लगानीमइ पुनर्निर्माण समिति नीस्वना ज्या न्ह्याने न्ह्याकेगु याःगु खः ।

पुनर्निर्माणया ज्या समितिं २०७५ सालया वैशाखं निसें न्ह्याकेगु ज्या याःगु खः । ज्या न्ह्याकेया नितिं दकले न्हापां महानगरपालिकां ५० लख दां समितियात व्यूगु खः अनं लिपा २ किस्ता याना न्यागू न्यागू करोड दां लःल्हाःगु खःसा वंगु असारय् जक हानं थप छगू करोड दां विइगु याःगु खः । महानगरपालिकां आर्थिक ग्वहालि याःगु आः तकया दुने ११ करोड ५० लख दां थ्यनेधुंकूगु दु ।

थुगु ज्याझ्वलय् येँ महानगर पालिकाया उपमेयर हरिप्रभा खड्गी श्रेष्ठ, निर्माण समितिया नायो सांसद राजेश शाक्य, न्वकु तेजरत्न ताम्राकार वडानायो न्हूच्छेकाजी महर्जन लगायतपिनिगु नं ब्वति दुगु खः ।

ऐतिहासिक व धार्मिकरुपं तकं महत्वपूर्ण जुयाच्वंगु मरुसतःया दयके ज्या आः निलाया दुने क्वचायकेगु ग्वसाः ग्वयाच्वंगु दु ।

लुमंकेबहजू छुं वाः न्ह्यो थुगु मरुसतः जःखःया गुम्ह भैरबयात भैरव पुजा याय्गु ज्या नं जूगु खः । वसपोलपिं १) रूरूक भैरब (पिगंननी दुहां वनेथायसं)२) संहार भैरब (गणेद्यःया छें क्वसं)३) कपिल भैरब (मरूहिती कवहां वनेथायसं)४)भीषण भैरब (गणेद्यःया लिक्कसं)५) असिताङ्ग भैरब (पचलि भैरबया खड्ग हिलेथाय् बौ वायथायसं)६) क्रोध भैरब (नासःद्यःया लिक्क ध्याको बनियाया न्ह्यःनेसं)७) प्रचण्ड भैरब(तहबिलया पुर्व व उत्तरया कुंचासं)८) उन्मत्त भैरब (सिंलयं सतःया पश्चिम या दुवातयसं) खः ।