काठमाडौं, ३० साउन। काठमाडौँ महानगरपालिका वडा नं १६ को कार्यालय भवन शिलान्यास गरिएको छ । महानगरपालिकाको रु ११ करोड ५२ लाख १२ हजार ६७६ लागतमा चमती बालाजुमा निर्माण हुन लागेको उक्त भवनको आज नगर प्रमुख विद्यासुन्दर शाक्य र उपप्रमुख हरिप्रभा खड्गी श्रेष्ठले शिलान्यास गर्नुभयो ।

वैदिक मन्त्र उच्चारणसहितको शिलान्यासमा अमरगढी नगरका प्रमुख विश्वेश्वरप्रसाद ओझा (विपिन), वडाध्यक्ष मुकुन्द रिजाल, महानगरका प्रमुख प्रशासकीय अधिकृत राजेश्वर ज्ञवाली र वडा सदस्यहरुले शिलान्यास पूजा गर्नुभएको थियो ।

शिलान्यास कार्यक्रमपछि बोल्दै प्रमुख शाक्यले महानगरको व्यवस्थित सेवा प्रवाहका लागि सुविधा सम्पन्न भौतिक पूर्वाधारका विषयमा कुरा गर्दै धेरैजसो वडा भवनहरु शिलान्यास भइसकेको बताउनुभयो ।

प्रमुख शाक्यले महानगरपालिकाको पहिलो बैठकमा काठमाडौँका सबै वडाभित्र वडा कार्यालय बनाउने निर्णय गरेको स्मरण गर्दै सोहीअनुसार वडा कार्यालय भवन निर्माण अगाडि बढिरहेको उल्लेख गर्नुभयो । उहाँले चालु आर्थिक वर्षमा पाँच वडा कार्यालय भवन निर्माण गर्ने बताउनुभयो ।

शिलान्यास भएकामध्ये केही उद्घाटन भइसकेका छन् भने केही निर्माण सम्पन्नताका चरणमा छन् । प्रमुख शाक्यले भन्नुभयो, ‘केही भवन हामीले शिलान्यास गरेका र्छौँ । उद्घाटन हाम्रो कार्यकालपछि हुनेछ ।

उपप्रमुख खड्गीले नयाँ भवन निर्माणसँगै जनताले सहज सेवा प्राप्त गर्नसक्ने हुँदा तोकिएकै समयमा निर्माण सम्पन्न गरिसक्नुपर्ने बताउँदै सुविधा सम्पन्न वडाबाट गुणस्तरीय सेवा प्राप्त गर्न सकिने उल्लेख गर्नुभयो ।

‘स्थानीय शासन चलाउन जग बलियो बनाउनु पर्छ । हामीले कार्यालय भवन निर्माण गरेर महानगरको सेवा व्यवस्थापनको जग मजवुत बनाउने प्रयास गरेका हौँ ‘, खड्गी श्रेष्ठको भनाइ थियो ।

उपमेयर खड्गी श्रेष्ठले केन्द्रले वडास्तरीय काम कारवाही गर्नकाे लागि कहिले पनि हस्तक्षेप नगरेकाे बताउँदै मेयर, उपमेयरले वडाकाे विकास निर्माणका कामहरूमा सम्पूर्ण अधिकार वडाका जनप्रतिनिधीहरूमा निहित भएकाे भन्नुभयाे ।

शिलान्यास कार्यक्रमपछि बोल्दै अमरगढी नगर प्रमुख ओझाले १८ वर्षपछि निर्वाचित जनप्रतिनिधी आइसकेपछि संविधानुसार गर्नुपर्ने सबै काम यहि कार्यकालमा पुरा नभएपनि सुरूवात गरेकाे बताउनुभयाे । उहाँले पदकाे शपथ लिंदाकाे शब्दहरू सम्झिदै आफ्नाे जिम्मेवारी, दायित्व पुरा गर्नुपर्ने बताउनुभयाे । संविधानअनुसार स्थानीय सरकार आइसकेपछि बिभिन्न कानुनहरू निर्माण गरेर अघि बढ्ने क्रममा आफ्नै वडा भवन बन्नु एक महत्वपूर्ण कदम भएकाे उहाँले बताउनुभयाे ।

वडा नं १६ का वडाध्यक्ष मुकुन्द रिजालले चमती जग्गा एकीकरण आयोजनाबाट रु आठ करोड ५० लाखमा २१ आना जग्गा खरिद गरी भवन निर्माण सुरु गरिएको बताउनुभयो । महानगरपालिकाकै सबैभन्दा ठूलो वडा नं १६ मा ४५ हजार घरधुरी रहेका छन् भने एक लाख ३५ हजारभन्दा धेरै जनसङ्ख्या छ ।

वडा कार्यालयको डिजाइन गर्दा आजभन्दा १० वर्ष पछिको अवस्थालाई आँकलन गरिएको छ । हामी वडाको सेवा कुनै पनि कारणले नरोकिने संरचना बनाउँदैछौँ । वडाध्यक्ष मुकुन्द रिजालले भन्नुभयो, ‘वडा कार्यालय बनाउने महानगरको निर्णय हरेक सेवाग्राहीको सुविधासँग जोडिएको विषय हो । यसकारण वडा कार्यालन बन्नुलाई सबैले गौरवका रुपमा ग्रहण गर्नुपर्छ ।’

भवनका डिजाइनर सार्वजनिक निर्माण विभागका इञ्जिनियर प्रेमबहादुर श्रेष्ठकाअनुसार बेसमेन्टसहित भवन १० हजार ७०३ बर्गफुट क्षेत्रफलको हुनेछ । भवनको भूमिगत तलामा १० वटा चारपाङ्ग्रे सवारी पार्किङ् गर्ने क्षमता हुनेछ । ६ जना व्यक्ति अट्ने क्षमताको लिफ्टसहितको भवन अपाङ्गमैत्री हुनेछ ।

भवन बाहिरबाट हेर्दा नेपाली परम्परागत शैलीको हुनेछ भने भित्र आधुनिक सुविधा हुनेछन् । भवनको जमिन तलामा सहरी स्वास्थ्य क्लिनिक र दर्ता चलानी कक्ष हुनेछ । पहिलो तलामा वडाध्यक्ष, वडा सदस्यहरु र वडा सचिवको कक्ष रहनेछ । दोस्रो तलामा प्रशासनिक कक्ष तेस्रो तलामा प्रमुखको बैठक र कार्यालय कोठा हुनेछ । भवनमा सुविधा सम्पन्न बैठक कक्ष हुनेछ ।

भवन निर्माणका लागि साउन २९ गते कार्यादेश दिइएको हो । यसको निर्माण अवधि १८ महिना (०७९ फागुन १५) सम्म रहनेछ । भवनको लागत अनुमान १० करोड ३७ लाख ३७ हजार ३१० रुपैयाँ गरिएको थियो । बोलपत्रका माध्यमबाट गरिएको खुल्ला प्रतिस्पर्धाबाट गौरी पार्वती/के एण्ड के. जी / रमिता जेभीले ७ करोड ५३ लाख २२ हजार ६४० अर्थात् २९.१६ प्रतिशत कममा निर्माण कबोल गरेर जिम्मा पाएको छ ।

१ रोपनी ४ आना २ पैसा जमिनमा निर्माण हुने भवनको बाहिरी भागमा मोटरसाइकल पार्किङ् गर्ने ठाउँ र हरियाली हुनेछ ।