काठमाडौँ । काठमाडौँ महानगरका प्रमुख विद्यासुन्दर शाक्यले महानगरका सामुदायिक विद्यालयहरू संस्थागत विद्यालयका लागि प्रतिस्पर्धी भएको बताउनुभएकाे छ । आज शिवपुरी स्कूलको ७३ औँ वार्षिकोत्सव तथा सम्मान कार्यक्रमलाइ सम्बाेधन गर्दै प्रमुख शाक्यले यस्ताे बताउनुभएकाे हाे ।

प्रमुख शाक्यले स्वच्छ शैक्षिक प्रतिस्पर्धाबाट शैक्षिक गुणस्तर बढाउने योजना कार्यान्वयन भइरहेकाे बताउनुभयाे । यसै बर्षदेखि ५ वटा प्राविधिक विद्यालय सञ्चालन गर्न बजेटको व्यवस्था गरिएको बताउनुभयो ।

‘हामीले विज्ञान, प्रविधि, इन्जिनियरिङ, मानविकी र गणित शिक्षाको प्रवद्र्धनका लागि आविष्कार क्लव (स्टीम क्लब) को अवधारणा ल्याउँदा सामुदायिक विद्यालयहरुले कार्यक्रम सञ्चालन गर्ने आँट गर्नुभएकाे थिएन । अहिले उहाँहरु कार्यक्रम माग्न थाल्नुभएको छ । सामुदायिक विद्यालयमा विद्यार्थी भर्ना दरमा प्रगति भएको छ ।’ शाक्यले भन्नुभयो, ‘निजी क्षेत्रबाट लगानी जोखिमको गुनासो आउन थालेको छ । हामीले निजी शैक्षिक क्षेत्रको लगानी जोखिम गराउने योजना बनाएका छैनौँ । हामी सामुदायिक विद्यालयको भौतिक अवस्था र शैक्षिक गुणस्तर सुधार गरेर प्रतिस्पर्धी बनाउँछौँ ।’

कार्यक्रममा पूर्वउपप्रधानमन्त्री ईश्वर पोखरेलले, विद्यालयलाई प्रविधियुक्त बनाउन सहयोग गर्ने बताउनुभयो । सामुदायिक विद्यालयबाट उत्पादन भएका जनशक्ति उच्च पदमा रहेर सेवा दिइरहनुभएको छ । सामुदायिक शैक्षिकत स्तरलाई जोगाउन सबैको प्रयास आवश्यक पर्छ । उहाँले, काठमाडौँ महानगरले शैक्षिक क्षेत्र सुधारका लागि अघि सारेका कार्यक्रमबाट परिणाम देखिन थालेको उल्लेख गर्नुभयो ।

शिवपुरी स्कूलमा यो बर्ष विद्यार्थी भर्नाको चाप थेग्न कठिन भयो । कार्यक्रममा वडा ३ का अध्यक्ष दीपक के. सी. ले महानगरले नीति र बजेटको व्यवस्था गरेपछि अवस्थामा परिवर्तन आएको उल्लेख गर्नुभयो ।

यो स्कूल नमूना विद्यालयका लागि छनौट भएको विद्यालय हो । यसमा आविष्कार क्लव कार्यक्रम सञ्चालनमा छ । विद्यालयका प्रधानाध्यापक दिवाकर दूरदर्शीकाअनुसार विद्यालयमा १ हजार २८९ विद्यार्थी छन् । विद्यालयमा प्राविधिकतर्फ कम्प्युटर इन्जिनियरिङ् अध्यापन हुन्छ । कक्षा ९ — १२ का लागि सञ्चालित यस कार्यक्रममा ५० जना विद्यार्थी अध्ययन गरिरहेका छन् ।

कार्यक्रममा प्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ र वडाध्यक्ष दीपक के. सी. लाई सम्मान गरिएको थियो । स्थानीय भाषाको पाठ्यक्रम कार्यान्वयन गरेको, प्राविधिक शिक्षाको प्रवर्धनमा लगानी गरेको र विद्यालय शिक्षालाई प्रतिस्पर्धी बनाउन नीतिगत प्रबन्ध गरेको योगदानको कदर स्वरुप उहाँहरुलाई सम्मान गरिउको हो ।