लोकंह्वाःगु सांगीतिक ब्याण्ड कुतुम्बं वंगु शनिवाः किपुलिइ सांगीतिक ज्याझ्वःयासें स्वास्थ्य शिविर सञ्चालन याःगु दु ।

कुतुम्बया सामाजिक उत्तरदायित्व वहनयायेगु झ्वलय् सानेपाया स्टार हस्पिटललिसे जानां किपू नगरपालिकाया समन्वयस स्वास्थ्य, संगीत व सम्पदा धकाः थ्व ज्याझ्वः याःगु खः ।

किपू नगरपालिका वडा नं. १ व २ थ्यूगु बाघ भैरव, सतःक्व, लाय्कू व क्वाःच्वय् बिस्कं बिस्कं हे दबू दयेका सांगितिक ज्याझ्वःयाःगु खःसा उगु हे थासय् वरिष्ठ चिकित्सकपिंपाखें सितिकं फाेर जी (GI&Gastro , Gynecology, Geriatric and General) लिसे स्वाःगु जाँच याःगु खः ।

स्वास्थ्य जाँचय् हि, सुगरलिसें मेमेगु जाँच याःगु खःसा स्वास्थ्य सल्लाह (परामर्श) व वासः नं सितिकं हे ब्यूगु खः ।

बहनीया इलय् क्वाःच्वय् जूगु कुतुम्भया ज्याझ्वलय् किपू नगरपालिकाया प्रमुख रमेश महर्जनं नं निपु म्येँ हालादीगु खः । थःगु थाय् थाँबाहाःया दाफा म्येँ नं हालादीम्ह संगीतप्रेमी नगर प्रमुख महर्जनं लोकंह्वाःगु नेवाः लोक म्येँ “सिरसाःसा हेकु, जिमि दाइचां ब्यूगु…..” व “ह्यांगु सिन्हः ह्यांगु कोखा …” म्येँ हालादीगु खः । थुगु म्येँ हालादीबलय् क्वाःच्व देगलय् च्वना स्वयाच्वंपिं सकलपिंसं लापा थाना न्ह्यइपुकादीगु खः ।