काठमाडौँ, १९ भदौ, काठमाडौँको विष्णुमती नदीले खतराको जल स्तर पार गरेको छ। जल तथा मौसम विज्ञान विभाग, बाढी पूर्वानुमान महाशाखाले मङ्गलवार रातिसम्म नदीको जल स्तर बढिरहेको जनाउँदै सतर्क रहन आग्रह गरेको छ। विभागको सूचनामा भनिएको छ, “विष्णुमती नदीको जल स्तर खतराको तह पार गरिसकेको र अझै बढ्दै छ। त्यसैले, नदी किनार भएर यात्रा गर्नेहरू र तटीय क्षेत्रमा बसोबास गर्नेहरूलाई उच्च सतर्कता अपनाउन आग्रह गरिएको छ।”

विभागले बाराको कलैया र आसपासमा भारी वर्षा भइरहेको र यसबाट पसा, लाल बकैया लगायतका खोलाहरूको बहाव बढ्न सक्ने भएकाले ती क्षेत्रका नदी किनारमा सतर्कता अपनाउन भनेको छ। त्यसै गरी, सिन्धुलीको कमला नदीको जल स्तर पनि सतर्कता तह नजिक रहेको र अझै बढ्दै जाने सम्भावना रहेकोले नदी किनारका क्षेत्रहरूमा उच्च सतर्कता अपनाउन सुझाव दिइएको छ।

विभागले आज कोसी, बागमती, र गण्डकी प्रदेशका केही साना नदीहरूमा बहाव उल्लेख्य रूपमा बढ्न सक्ने अनुमान गरेको छ। साथै, कोसी, मधेस, लुम्बिनी, र सुदूरपश्चिम प्रदेशका एक-दुई स्थानमा भारी वर्षा हुने सम्भावना रहेको र राति कोसी, मधेस, र गण्डकी प्रदेशका केही भागमा भारी वर्षा हुनसक्ने विभागले जनाएको छ।

आजको मौसम प्रतिकूल छ, नदी किनारमा बसोबास गर्ने सबैले उच्च सतर्कता अपनाउनु अति आवश्यक छ।