काठमाडौँ, २३ भदाै : ऋषिपञ्चमी पर्वको अवसरमा काठमाडौं उपत्यकाका वाग्मती, विष्णुमती, रुद्रमती, मनमती लगायतका नदी किनारमा स्नान गर्ने महिलाको भीड लागेको छ। तीज पर्व अन्तर्गत मनाइने यस दिन महिलाहरूले विशेष स्नान गर्ने धार्मिक परम्परा रहेको छ। नदी, ताल, तलाउ वा पोखरीमा स्नान गर्नु पवित्र मानिन्छ। गोकर्ण र कागेश्वरी मनोहरा क्षेत्रका महिलाहरू गोकर्णेश्वरदेखि सुन्दरीजलसम्मको क्षेत्रमा स्नान गर्न पुगेका छन्।

विशेषगरी गोकर्ण ब्यारेजको माथिल्लो भागमा महिलाहरूको ठूलो भीड देखिन्छ। काठमाडौँको सहर क्षेत्रका महिलाहरूले सार्वजनिक सवारीसाधन रिजर्भ गरी नदी किनारमा स्नान गर्न पुगेका छन्। स्नानपछि सप्तऋषि र अरुन्धतीको पूजा गर्ने प्रचलन रहेको छ।

ऋषिपञ्चमीको धार्मिक महत्वबारे धर्मशास्त्रविद् प्रा. डा. रामचन्द्र गौतमले जानकारी दिँदै, यस पर्वमा महिलाहरूले रजस्वलाका समयमा हुन सक्ने त्रुटिबाट मुक्ति पाउन सप्तऋषिको पूजा गर्ने शास्त्रीय विधि रहेको बताए। स्नान पछि ३६५ वटा दत्तिवनले दाँत माझ्ने, गोबर, माटो र खरानीले शरीर शुद्ध गर्ने परम्परा रहेको छ।

पूजापछि महिलाहरूले सामा, कागुनो, कन्दमूल जस्ता अन्न खाई एक छाक हविष्य बस्ने गर्छन्। काठमाडौँका विभिन्न ऋषेश्वर मन्दिरहरूमा समेत आज महिलाहरूको उल्लेख्य उपस्थिति देखिएको छ।

ऋषिपञ्चमी पर्वमा काठमाडौंका नदी किनारमा महिलाहरूको स्नान र पूजा आराधनामा विशेष चहलपहल देखिएको छ। यस धार्मिक परम्पराले महिलाहरूलाई शुद्धता र पवित्रताको अनुभूति दिलाउँछ।