काठमाडौँ – असोज ११ र १२ गतेको बाढी, पहिरो र डुबानबाट हालसम्म २२४ जनाले ज्यान गुमाएका छन्। प्रधानमन्त्री केपी शर्मा ओलीद्वारा आयोजित पत्रकार सम्मेलनमा मुख्यसचिव एकनारायण अर्यालले विपद्‌का कारण भएको धनजनको क्षतिबारे जानकारी गराए।

मुख्यसचिव अर्यालले २१ जिल्लामा बाढी पहिरोले प्रभाव पारेको र २४ जना अझै बेपत्ता रहेको बताए। त्यस्तै, १५८ जना घाइते भएको र ४ हजार ३३१ जनाको उद्धार भएको जानकारी पनि दिइयो।

प्रारम्भिक अनुमानअनुसार, बाढी र पहिरोबाट ११ अर्बभन्दा बढीको क्षति भएको छ। खानेपानीतर्फ ३ अर्ब ५५ करोड, सडकमा २ अर्ब ५२ करोड, ऊर्जामा ४ अर्ब र सिँचाइमा १ अर्बको क्षति भएको छ। कृषिमा मात्र ६ अर्ब बराबरको नोक्सान भएको छ।

सरकारले ३० हजार ७ सय सुरक्षाकर्मीसहित हेलिकोप्टर प्रयोग गरी खोजी र उद्धार कार्य गरिरहेको छ। अवरुद्ध ३७ राजमार्गमध्ये ९ वटा सञ्चालनमा आइसकेको र बाँकी सडक खोल्ने प्रयास जारी छ।