बागमती : हेटौँडा–चित्लाङ–चन्द्रागिरि–काठमाडौँ र हेटौँडा–पालुङ–नौबिसे सडक खण्डमा आज बिहानदेखि सवारीसाधन पुनः सञ्चालनमा आएका छन्। जल तथा मौसम विज्ञान विभागले भारी वर्षाको चेतावनी जारी गरेपछि स्थानीय प्रशासनले केही समय सवारी रोक लगाएको थियो।

मकवानपुर जिल्ला प्रहरी कार्यालयका निमित्त प्रवक्ता ठाकुरप्रसाद सापकोटाले कुनै अवरोध नभएको पुष्टि गर्दै सवारी पुनः सञ्चालन भएको जानकारी दिए। हेटौँडा–पालुङ–नौबिसे सडकमा भने हाल हलुका सवारी सञ्चालन भइरहेको छ।

प्रमुख जिल्ला अधिकारी तीर्थराज चिलुवालले बाढीपहिराबाट अवरुद्ध सडकहरू खुलाउन सडक विभाग, सुरक्षाकर्मी, र प्राविधिक टोलीले निरन्तर काम गरिरहेको बताए। हेटौँडा–भैँसे–रातोमाटे खण्डको पहिरो पन्छाउन चारवटा मेसिन परिचालन गरिएका छन्। साथै, इन्द्रसरोवर गाउँपालिका नजिकको कुलेखानी पुलको पुनर्निर्माण कार्य पनि जारी छ।