जिल्ला प्रशासन कार्यालय कैलालीले सङ्घीय सरकारले तोकेको धानको न्यूनतम समर्थन मूल्य कार्यान्वयन गर्न जिल्लाका कृषक र उद्योगीव्यवसायीलाई अनुरोध गरेको छ।

किसानले उचित मूल्य नपाएको गुनासो बढेपछि प्रशासनले शुक्रबार सूचना जारी गरी यो आग्रह गरेको हो। सूचनामा उल्लेख छ कि गत साउन २६ गतेको मन्त्रिपरिषद् बैठकले मोटोधानको न्यूनतम मूल्य प्रतिक्विन्टल ३४६३.८१ रुपैयाँ र मध्यमधान ३६२८.३३ रुपैयाँ तोकेको थियो।

तर सरकारको तोकिएको मूल्य किसानले पाएका छैनन्। कञ्चनपुरका किसान केशव पाठकले भने, “धान खरिद गर्ने व्यापारीले एकाधिकारको अवस्था बनाइरहेका कारण किसानले उचित मूल्य पाएका छैनन्। भारतबाट पर्याप्त चामल आयात हुने भएकाले व्यापारीले अधिकतम रु २६५० मात्र दिने जवाफ दिन्छन्।”

धान किसानको मुख्य आम्दानीको स्रोत हो। घरायसी उपभोगका लागि आवश्यक धान भण्डारण गरी बढी भएको धान स्थानीय व्यापारीलाई बिक्री गर्ने आम्दानीबाट वर्षभरिको खर्च जोहो गरिन्छ।