वीरगञ्ज । दीपावलीको तयारीका क्रममा वीरगञ्जमा झिलिमिली बत्ती (झालरबत्ती) जडान गर्ने क्रममा करेन्ट लाग्दा एक किशोरको मृत्यु भएको छ ।

वीरगञ्ज महानगरपालिका–१ छपकैयाका १७ वर्षीय पीयूष साह आफ्नै घरमा झिलिमिली बत्ती जडान गर्दै गर्दा शनिबार साँझ करिब ६ बजे करेन्ट लागेर गम्भीर घाइते भएका थिए । स्थानीयले तत्काल उद्धार गरी नारायणी अस्पताल पुर्‍याए पनि उपचार सम्भव नभएपछि नेशनल मेडिकल कलेज लैजाने क्रममा बाटोमै उहाँको मृत्यु भएको प्रहरीले जनाएको छ ।

वडा प्रहरी कार्यालय बिर्ताका प्रहरी निरीक्षक निरोज चौलागाईंका अनुसार घटनाको समयमा पीयूष घर सजाउँदै थिए । “अचानक विद्युत् प्रवाह भएर उनी सख्त घाइते भएका थिए,” उहाँले बताउनुभयो ।

छपकैया बजारका लालु साह तेलीका छोरा पीयूषको निधनसँगै दीपावलीको उल्लासपूर्ण माहोल शोकमय बनेको छ । प्रहरीले झिलिमिली बत्ती जडान गर्दा विद्युत् सुरक्षामा विशेष ध्यान दिन सर्वसाधारणलाई आग्रह गरेको छ ।