काठमाडौँ । ट्राफिक प्रहरीले सवारी चालकको लाइसेन्स, ब्लुबुक वा सवारीको साँचो नियन्त्रणमा लिन नपाउने सर्वोच्च अदालतको फैसला यथावत् कायम भएको छ।

नेपाल प्रहरी प्रधान कार्यालयले उक्त फैसलाविरुद्ध दिएको पुनरावलोकन निवेदन सर्वोच्च अदालतले अस्वीकार गरेपछि ट्राफिक प्रहरीले लाइसेन्स, ब्लुबुक र साँचो नियन्त्रणमा लिन नपाउने कानुनी व्यवस्था कायम भएको हो।

न्यायाधीश महेश शर्मा पौडेल, बालकृष्ण ढकाल र नृपध्वज निरौलाको इजलासले पुनरावलोकनको अनुमति दिन अस्वीकार गरेको हो।

यसअघि सर्वोच्च अदालतले २०८२ पुस ६ गते विवेक चौधरीले दायर गरेको रिटमा फैसला गर्दै ट्राफिक प्रहरीले कानुनले अधिकार नदिएको अवस्थामा चालकको लाइसेन्स, ब्लुबुक वा साँचो नियन्त्रणमा लिन नमिल्ने ठहर गरेको थियो। त्यसविरुद्ध नेपाल प्रहरीले पुनरावलोकनको माग गर्दै निवेदन दिएको थियो।

सर्वोच्चले न्याय प्रशासन ऐन, २०७३ को दफा ११ अनुसार पुनरावलोकन गर्नुपर्ने कुनै कानुनी आधार नदेखिएकाले अनुमति दिन नमिल्ने निष्कर्ष निकालेको छ। यससँगै ट्राफिक प्रहरीले नियम उल्लंघनको बहानामा चालकका कागजात वा साँचो नियन्त्रणमा लिने अभ्यास कानुनी रूपमा रोकिएको छ।