काठमाडौं महानगरपालिका १८ वडाबाट जेष्ठ नागरिक विशेष भत्ता वितरण गरेको छ । सोमबारदेखि महिलाकाे हकमा ७५ वर्ष पुरा र पुरूषकाे हकमा ८० वर्ष पुरा भएका जेष्ठ नागिरकहरूलाइ घर आँगनसम्म पुगेर विशेष भत्ता वितरण गरिएको हो ।

हाल कोरोना भाइरसको संक्रमणबाट बच्न देशैभरी लकडाउन जारी नै छ । लकडाउनको समयमा सरकारले अतिआवश्यक काममा मात्र घर बाहिर निस्कन आग्रह गरेको छ । बिनाकाम घरबाहिर निस्कन नपाउँदा बाल बच्चा तथा बृद्धहरु घरमै बस्नुपरेका छन् ।

कामपा १८ वडा अध्यक्ष न्हूछेँकाजि महर्जन, वडासदस्यहरु हेम शाक्य, शोभा महर्जन र रचना शर्माबाट घरदैलो कार्यक्रम मार्फत विशेष भत्ता वितरण गरेका छन् । जनप्रतिनिधिहरुले भत्ता वितरण क्रममा बृद्धहरुको दिनचर्या, स्वास्थ्य अवस्थाको पनि जानकारी लिए ।

काठमाडौं महानगरपालिकाबाट बृद्ध तथा अपांगता भएकाहरुलाई वर्षको एकचोटी भत्ता वितरण गर्ने गरिएको छ ।

विशेष भत्ता स्वरुप वार्षिक रु. १२ हजार र अपांगता भत्ता स्वरुप रु.३ हजार वितरण गरेको वडाअध्यक्ष न्हूछेँकाजी महर्जनले बताए ।

कामपा १८ वडामा विशेष भत्ता पाउने नामावली अनुसार १ सय ५४ महिला, ३८ पुरुष र १६ जना अपांगता भएका व्यक्तिहरु छन् ।

सोमबार ६० घर वितरण सम्पन्न भएको वडासदस्य शोभा महर्जनले जानकारी दिए । उनले बाँकी मंगलबार विहान ८ बजेदेखि वितरण सुरु हुने पनि बताए ।