भक्तपुर। राष्ट्रिय परीक्षा बोर्डको परीक्षा नियन्त्रण कार्यालयले यस वर्षको एसइई परीक्षाको नतिजा बिहीबारसम्म सार्वजनिक गर्ने तयारी गरेको छ। कक्षा १० का परीक्षा नियन्त्रक नन्दलाल पौडेलले नतिजा सार्वजनिक गर्ने अन्तिम तयारी भइरहेको जानकारी दिनुभयो। कार्यालयले तयार पारेको कार्ययोजनाअनुसार उत्तरपुस्तिका परीक्षण, अंक प्रविष्टि र ‘मिस म्याच’को काम सकेर नतिजा प्रकाशनको अन्तिम तयारी भइरहेको छ।

परीक्षा नियन्त्रक पौडेलका अनुसार असार १५ गतेभित्र नतिजा सार्वजनिक गर्ने बोर्डको तालिका हो। उहाँले भन्नुभयो, “तालिकाभन्दा छिटो नतिजा सार्वजनिक गर्न बोर्ड र परीक्षा नियन्त्रण कार्यालयले तीव्र गतिमा काम गरिरहेका छौँ, बिहीबारभित्र नतिजा सार्वजनिक गर्ने गरी काम भइरहेको छ।” उहाँले कर्मचारीहरूको समूह बनाएर काम भइरहेको र ५२ वटा परीक्षण केन्द्रमा उत्तरपुस्तिका परीक्षण सम्पन्न भई बाँकी काम कार्यालयमा भइरहेको जानकारी दिनुभयो।

गत वर्ष असार २४ मा एसइईको नतिजा सार्वजनिक गरिएको थियो। यस वर्षको एसइईको नतिजा सैद्धान्तिक र प्रयोगात्मक परीक्षा फरक गरी सार्वजनिक गरिनेछ। परीक्षा नियन्त्रक पौडेलले सैद्धान्तिकतर्फ ७५ अङ्कको परीक्षामा ३५ प्रतिशत अर्थात् २७ अङ्क नल्याउनेलाई एनजी (Not Graded) उल्लेख गरिने बताउनुभयो।

यस वर्षको एसइईमा नियमिततर्फ चार लाख ६७ हजार र ग्रेड वृद्धितर्फ २१ हजार परीक्षार्थी सहभागी भएका थिए।

#एसइईनतिजा२०८१ #राष्ट्रियपरीक्षाबोर्ड #विद्यार्थी