काठमाडौँ  : नेपाल संवत् ११४५ आज नेपालभर विविध कार्यक्रम गर्दै मनाइँदैछ। नेवार समुदायले नयाँ वर्षका रुपमा मनाउने यो संवत्को स्थापना राष्ट्रिय विभूति शङ्खधर साख्वाले गरिब जनताको ऋण मोचन गर्दै विसं ९३७ (इ.स. ८८०) मा सुरु गर्नुभएको थियो।

नेपाल संवत्लाई प्राचीन कालदेखि नेपालमा मौलिक संवत्का रुपमा मान्यता दिइएको छ। लिच्छविकालका राजा राघवदेवको पालादेखि सुरु भएको यो संवत् पृथ्वीनारायण शाहको शासनकालसम्म राष्ट्रिय मान्यता प्राप्त संवत्का रुपमा चलाइएको थियो, भने नेपालका विभिन्न नेवार समुदाय बाहुल्य स्थानमा आज पनि विशेष कार्यक्रमसहित यसलाई नयाँ वर्षका रुपमा मनाइन्छ।

२०५६ सालमा नेपाल संवत्का संस्थापक शङ्खधर साख्वालाई राष्ट्रिय विभूति घोषणा गरिएपछि २०६५ सालमा तत्कालीन प्रधानमन्त्री पुष्पकमल दाहालले नेपाल संवत्लाई राष्ट्रिय मान्यता दिने घोषणा गर्नुभएको थियो। काठमाडौँमा यस अवसरमा परम्परागत बहीखाता बन्द गरी कात्तिक शुक्ल प्रतिपदामा नयाँ बहीखाता सुरु गर्ने चलन पनि कायमै छ।