मेट्राेन्यूज / चितवन, साउन ६ ।

भरतपुर महानगरपालिकाले एसइईको नतिजा अगावै कक्षा ११मा भर्ना लिन राेक लगाएकाे छ ।

महानगरपालिका शैक्षिक प्रशासन महाशाखाले एक सूचना जारी गर्दै केही विद्यालयहरूले कक्षा ११ को भर्ना सुरु गरिसकेको अभिभावकको गुनासो आएकाले एसइईको नतिजा प्रकाशित नभएसम्म भर्नामा राेक लगाएकाे हाे ।

नगर शिक्षा अधिकारी महेन्द्रप्रसाद पौड्याल र नगर शिक्षा समितिसहितको टोलीले स्थलगत अनुगमन गरी केही विद्यालयलाई स्पष्टीकरणसमेत सोधेको जनाएको छ ।

अनुगमनका क्रममा रजिस्ट्रेसन तथा सिट सुरक्षित गर्ने नाममा नतिजा अगाडि नै कक्षा ११ को भर्ना गरेको पाइएको पौड्यालले जानकारी दिनुभयो ।

विद्यार्थी अन्यत्र जान सक्ने भन्दै अधिकांश संस्थागत विद्यालयले रजिस्ट्रेसन शुल्कका नाममा थोरै रकम लिएर अनलाइन माध्यमबाट पठनपाठन सुरु गरेका हुन् ।

महानगरमा २८ सामुदायिकसहित ५० भन्दा बढी कक्षा ११ को पठनपाठन गर्ने विद्यालयमा अनुगमनलाई निरन्तरता दिएर आदेश नमानेमा कारबाही गरिने पौड्यालले बताउनुभयो ।