मेट्राेन्यूज / काठमाडाैं, साउन ११ ।

स्वास्थ्य तथा जनसङ्ख्या राज्यमन्त्री उमेश श्रेष्ठले चाँडै नै सेवामूलक अस्पताल खोल्ने बताउनुभएको छ  ।

शिक्षा तथा स्वास्थ्य समितिको कोभिड–१९को वर्तमान स्थिति र सम्भावित तेस्रो लहरको सम्बन्धमा छलफल गर्न आज सिंहदरबारमा बसेको बैठकमा मन्त्री श्रेष्ठले कोभिडको महामारीमा समेत जनताले चर्को शुल्कमा उपचार गर्नु परिरहेको भन्नुहुँदै कम शुल्कमा बढी सेवा दिने खालको अस्पताल खोल्ने आफ्नो चाहना रहेको बताउनुभयो ।

मन्त्री श्रेष्ठले खोपको सुनिश्चितता प्रदान गर्नु अहिलेको आवश्यकता भएको भन्नुहँंदै  चाँडोभन्दा चाँडो सबै नागरिकलाई खोप उपलब्ध गराइने बताउनुभयो ।

मन्त्री श्रेष्ठले  कोभिडको सङ्क्रमणका बेला  अग्र पङ्क्तिमा रहेर काम गर्ने स्वास्थ्यकर्मीलाई प्रोत्साहनबापत दिने भनिएको रकम छिट्टै उपलब्ध गराइने बताउनुभयो ।

उहाँले शिक्षक, प्राध्यापकहरूका लागि चाँडै नै खोप उपलब्ध हुने बताउनुभयो ।

बैठकमा सांसदहरुले कोभिडको तेस्रो लहर आउनुभन्दा अगावै  सबै नागरिकलाई खोप लगाउनु पर्ने र आवश्यक सबै तारतम्य मिलाउनुपर्नेमा जोड दिनुभयो । 

बैठकमा स्वास्थ्य तथा जनसङ्ख्या मन्त्रालयका सचिव लक्ष्मण अर्यालले यस्तै अवस्था कायम रहे असोज÷कार्तिकसम्ममा कोभिडको तेस्रो लहर सुरु हुन सक्ने बताउनुहुँदै त्यसका लागि आवश्यक पूर्व तयारी गर्नुपर्नेमा जोड दिनुभयो ।