किपू नगरपालिका वडा नं. ७ भाजंगःया महर्जन गुथि छेँया उलेज्या जूगु दु । वंगु शनिवाः किपू नगरपालिकाया प्रमुख रमेश महर्जनं रिवन चानां उगु गुथि छेँया उलेज्या यानादीगु खः । उगु गुथि छेँय् प्लाष्टर व ल्यूनेया लँ तबालाः याना दयेकूगु खः ।

थुगु ज्या या लागि मुक्कं ७ गु लख ४१द्वः चाःचू बजेट खःसा नगरपालिकापाखें ६ गू लख बजेट विनियोजन यानाब्यूगु खः । ल्यं दुगु जनश्रमदानपाखें चूलाकूगु खः । थुगु ज्या पूवंकेत सन्तोषकुमार महर्जनया अध्यक्षताय् स्वम्ह मिसा सहित गुम्हच्वना“गुठि घर तथा बाटो सुधार उपभोक्ता समिति” दयेकूगु खः ।

वंगु भदौ २० गते नगरपालिकाय् सम्झौतायाना ज्या न्ह्याकूगु खःसा थ्वहे मंसिर २९ गते दुने सिधयेकेगु आजु तयातःगु खः । गुथि छेँया उलेज्या यानादिसें नगर प्रमुख महर्जनं गुथिया समस्या थःम्हं थूगुलिं थजाःगु गुथिया छेँ दनेत थःम्हं नगरापालिका पाखें ग्वहालि यानाच्वनागु न्ह्यथनादिल ।

गुथि धयागु झीगु नेवाः समाजयात छधी छप्पं जुइक चीनां तइगु जूगुलिं झी सकले गुथिस आवद्ध जुयाच्वनागु धयादिसें गुथिया थकालिपिंसं नं ई कथं हिलाः झीगु समाजय सुंयात समस्या जूसा समाधान यानाबीमाःगु खँय् बःबियादिल । आः थुगु गुथि छेँय् च्वना भ्वय् नयेगु जक मयाःसे थुगु थाय्यात छ्यलाः छुं नं छुं आम्दानी जुइगु ज्या यायेमाःगु धयादिल ।

किपू थौंकन्हय् नयेगु नसाया लागि नां जाये धुंकूगुलिं आःपाःलं मनूत वयाच्वंगु न्ह्यथनादिसें भाजंगलय् नं फःसा नसा पसः चायेका सामुहिक लजगाः जुइगु ज्या यायेत नं इनाप यानादिल ।