किपू नगरपालिकां थुगु शैक्षिक सत्रंनिसें लागु याःगु स्थानीय पाठ्यक्रमया नितिं स्यनामिपिं (शिक्षकपिं) नं ल्यये धुंकूगु दु । वय्कपिं ब्वनेकुथि वनां स्थानीय पाठ्यक्रम ब्वकेगु ज्या नं न्ह्याके धुंकूगु दु ।

थ्वहे झ्वलय् किपुलिइ स्थानीय पाठ्यक्रम धइगु नेपालभाषा (नेवाःभाय्) जूगुलिं ब्वनेकुथि वनां नेपालभाषा स्यंवनीपिं शिक्षकपिंत अझ अःपुइमा धकाः थ्व चिकुलाया इलय् प्रशिक्षण ज्याझ्वः शुरू याःगु दु ।

निलायंक जुइगु थुगु प्रशिक्षण ज्याझ्वःया वंगु शनिवाः मंगल मा.वि.इ किपू नगरपालिकाया नगर प्रमुख रमेश महर्जनं उलेज्या यानादीगु खः ।

कीर्ति रिसर्च सेन्टर किपूया ग्वसालय् जूगु थुगु प्रशिक्षण ज्याझ्वलय् न्ववानादिसें नगर प्रमुख महर्जनं थुगु प्रशिक्षण ज्याझ्वःलय् ब्वति कायेगु बोझ कथं मकायेत इनाप यानादिल ।

झीसं सःगु नेपालभाषा ब्वनेकुथि मस्तय्त स्यनेगु व मचां छेँय् छेँय् वनां झीगु थःगु नेपालभाषा ल्हानां भाषा ल्यंकाः तयेगुलि ग्वहालि जुइगु कनादिल । लिसें थुकिं लजगाः नं दयावःगुलिं थ्व न्हापांगु कुतःसुथांलाःसा लिपायात अःपुइगु नगर प्रमुख महर्जनं कनादिल ।

ज्याझ्वलय् उप–प्रमुख सरस्वती खड्कां किपुलिइ नेवाः मखुपिं विद्यार्थीपिंसं नं नेवाः भाय् ब्वने दइगुलिं थुकिंयाना उमित लिपा तःधंगु उपलब्धी दइगु कनादिल । ज्याझ्वः ग्वसाःखलःया नायः डा. बज्रमुनि वज्राचार्यया समापत्विय् जूगु खःसा न्वकू कर्ण महर्जनं लसकुस यानादीगु खः ।

शिक्षा शाखाया जुजुभाइ महर्जन, ग्वसाःखलःया प्रयागमान प्रधानपिंसं नं थःथःगु नुगः खँ तयादीगु ज्याझ्वः जीवन महर्जनं न्ह्याकादीगु खः ।