कीर्तिपुर नगरपालिका वडा नं. ८ पांगामा सञ्चालित शुभसेवा बचत तथा ऋण सहकारी संस्था लि.को तेह्रौं वार्षिक साधारण सभा शनिबार सम्पन्न भएको छ ।

कीर्तिपुर नगरपालिका वडा नं. ७ टाउनप्लानिङ्गमा अवस्थित शुभकामना ब्याङक्वेटमा भएको उक्त साधारण सभाको कीर्तिपुर नगरपालिकाका प्रमुख रमेश महर्जनले उद्घाटन गर्नुभएको थियो ।

संस्थाका अध्यक्ष बालकृष्ण श्रेष्ठको सभापत्विमा सम्पन्न भएको उक्त साधारण सभाको उद्घाटन गर्नुहुँदै नगर प्रमुख महर्जनले उद्यमशीलता विकास गर्न सहकारीले लगानी गर्नुपर्नेमा जोड दिनुभयो ।

कोभिडका कारण सिथिल प्रायः भैरहेको हालको अवस्थालाई मध्यनजर
गरी स–साना उद्योगहरू सञ्चालन गर्न गराउन विश्वासकै आधारमा रोजगारी श्रृजना हुनेगरी लगानी गर्न सुझाव दिनुभयो ।

संस्थाका सचिव राजेन्द्र श्रेष्ठले स्वागत गर्नुभएको कार्यक्रम कार्यकारी प्रमुख अरुण डंगोलले सञ्चालन गर्नुभएको थियो । कार्यक्रममा संस्थाका संस्थापक प्रकाशराम महर्जनको निधन प्रति श्रद्धाञ्जली व्यक्त गरिएको थियो ।

त्यसैगरी टाउन प्लानिङ्ग मै सञ्चालित भिजन कीर्तिपुर बचत तथा ऋण सहकारी संस्था लि.को चौधौं साधारण सभा पनि शनिबार नै सम्पन्न भएको थियो ।

नगर प्रमुख महर्जनले पानसमा दीप प्रज्वलन गरी उद्घाटन गर्नुभएको साधारण सभा संस्थाका अध्यक्ष राममान महर्जनको सभापतित्वमा सम्पन्न भएको थियो ।

वडा नं. ९ स्थित कृष्ण क्याटरिङ्गमा भएको उक्त कार्यक्रममा सहकारीमा बचत तथा कारोबार गर्ने उत्कृष्ट व्यक्तिहरूलाई दोसल्ला ओढाई सम्मान गरिएको थियो ।