किपू नगरपालिकाया ग्वसालय् न्ह्यानाच्वंगु हार्माेनियम प्रशिक्षण ज्याझ्वः लत्या पूवंगु दु । नेवाः मौलिक अमूर्त सम्पदा दाफा संस्कृतियात ल्यंकाःतयेया नितिं दाफायात माःगु सूर, ताल व लय् पाय्छि जुयेमा धकाः थुगु हार्माेनियमया प्रशिक्षण जुयाच्वंगु खः ।

वंगु पुस ४ गते निसें न्ह्याःगु खःसां औपचारिक उलेज्या वंगु पुस ८ गते किपू नगरपालिकाया प्रमुख रमेश महर्जनं यानादीगु खः । किपू नगरपालिका वडा नं. २ स्थित नेपालभाषा एकेदेमिं न्ह्यानाच्वंगु थुगु प्रशिक्षण किपू नगरया आपाःलं दाफा खलकं ब्वतिकयाच्वंगु दुसा उकीमध्ये थ्यंमथ्यं ४० प्रतिशत मिसापिनिगु ब्वति दुगु खः ।

कोभिडया हुनिं आपाः मनूत मुने मज्यूगु नेपाल सरकारया उजंयात नालाःकासें निगू पुचः दयेकाः प्रशिक्षण बियाच्वंगु दुसा प्रत्येक पुचःया छन्हु अतः पाः लानाच्वंगु दु ।

पुसया चिकुलाया इलय् नं बांलाक प्रशिक्षण बियाच्वंगु व क्वाःलः, चिया व हिटरया समेत व्यवस्था यानादीगुलिं प्रशिक्षार्थिपिंसं किपू नगरपालिकायात सुभाय् बियादीगु दु ।

थुगु दाफा संस्कृति नेवाःतय्गु जक मखुसें नेपाःदेय्या हे मूवंगु संस्कृति जूगुलिं थुकिंयात ल्यंकाः तयेमा धयादिसें प्रशिक्षक सुरेन्द्र श्रेष्ठं नेपाःदेय्या हे म्हसीका जुयाच्वंगु थुगु दाफा संस्कृति ल्यंकाः तयेया नितिं धकाः हार्माेनियम सयेकेत झायादीपिं प्रशिक्षार्थिपिं छन्हु हे छम्ह हे पाः मजूगुलिं थःपिं नं उत्साहित जुयागु प्रशिक्षक श्रेष्ठं कनादिल ।

स्वलायंकंया थुगु प्रशिक्षण बच्छि पूवने धुंकूगुलिं आः ल्यंदनिगु लत्यां नं सयेके गाइमखु धयादिसें प्रशिक्षार्थिपिंसं थुकीयात ई तनेमाःगु सुझाव बियादीगु दु ।

हार्माेनियम सयेकेत गुगु नं ईष्टिच्यूटय् वन धाःसा दां नं आपाः मालीगु व थःगु ई नं यक्व बी मालीगु तर किपू नगपालिकां थःलिक्क हे सितिकं हे थुगु प्रशिक्षण बियादीगुलिं किपू नगरपालिकाया थुगु ज्यायात न्ह्याक्व च्वछासेंं मगाः धयादिसें प्रशिक्षार्थिपिंसं थन सयेकागु हार्माेनियम थःगु त्वालय् दाफा खलकय् छ्यलेगु धका प्रतिवद्धता प्वंकादिल ।

दाफा संस्कृतियात ल्यंकाः तयेमाः व थुकीयात सूर, ताल व लय् मिले जुइमा धकाः किपू नगरया स्वीस्वंगू हे दाफा खलःतय्त किपू नगरपालिकां वंगु निला न्ह्यः हे छगः छगः हार्माेनियम लःल्हाना ब्यूगु खः ।

थुगु हार्माेनियम प्रशिक्षणया आइतवाः किपू नगरपालिकाया प्रमुख रमेश महर्जन, वडा नं. १ या अध्यक्ष हर्ष महर्जन व वडा नं. २ या अध्यक्ष रमेशमान डंगोलपिंसं निरीक्षण यानादीगु खः ।

नगरपालिकाया ज्या भौतिक निर्माण जक मखुसें नगरबासीया जीवनलिसें नं स्वायेमाः धयादिसें नगर प्रमुख महर्जनं थुगु हार्माेनियम प्रशिक्षण धुंकाः थुकीयात फुफुपिंसं लजगाःया रुपय् छ्यलादीत नं सुझाव बियादिल ।

प्रशिक्षकपिं सुरेन्द्र श्रेष्ठ, तीर्थ माली व राजेन्द्र महर्जनपिंसं थुगु स्वलायंकंया हार्माेनियम प्रशिक्षण बियाच्वनादीगु खः ।