काठमाडौं/२०७६ माघ १३
संखरापुर नगरापालिका वडा नं ७ धुलां टोलका पुजारी सुदन राजोपाध्याय्को घरबाट ज्यातिर्लिङ्गेश्वर महादेवको मूर्ति सोमबार राति चोरी भएको छ ।

साँखुको साल्खा महादेवस्थानको नामले चिनिने ज्योतिर्लिङ्गेश्वर महादेवको सुनको जलप लगाएको तामाको प्रतिमूर्ति (करीब ४ सय वर्ष पुरानो जात्रा गरिने देवता) साँखुका मूल पुरोहित सुदन राज राजोपाध्यायको घर शंखरापुर–७ धुँलाटोलबाट गए राति चोरी भएको छ ।

सुदनका काका आनन्द राज राजोपाध्याय राति शौचालय जानको लागि बाहिर निस्कन खोज्दा बाहिरबाट चुकुल लगाएकोले झ्याल खोली बाहिर आउदा मूर्ति राखिएको कोठाको ढोका खुल्लै रहेको र अन्य कोठाहरूमा समेत बाहिरबाट चुकुल राखिएको पाएपछि महादेबको मूर्ति राख्ने कोठामा मुर्ति नदेखिएपछि छरछिमेक तथा प्रहरीलाई खबर गरेको बताए ।

ज्योतिर्लिङ्गेश्वरको प्रतिमूर्ति जनै पुर्णिमाका दिन साँखु बजारमा जात्रा गरिन्छ । अन्दाजी २.५ फिटको चारमुखी सो मुर्ति करिब राति १ देखि २ बजेको बीचमा चोरी भएको अनुमान पुजारी सुदनराज राजोपाध्यायको रहेको छ ।

सुदनकाअनुसार घटना स्थलमा पर्खालको गमला फुटेको र पर्खालसँगै मुर्तिमा रहेको महादेबको नाग भेटिएकोले घरको पर्खाल चढेर घरभित्र आई मुर्ति चोरेको हुन सक्ने आशंका रहेको छ । घरमा ब्रतालुहरूसमेत बस्ने गरेकोले आवतजावतमा समस्या नहोस भनि च्यानलगेटमा केहि दिन देखि ताला नलगाएको उनले बताए ।

घटनाको खबर प्राप्त भए लगतै प्रहरी परिचालन गरेको महानगरीय प्रहरी प्रभाग साँखुका प्रहरी निरीक्षक गोबिन्द पन्थीले बताए । पन्थीका अनुसार घटनालाई गम्भिररूपमा लिइ सुक्ष्म अनुसन्धान भैरहेको र माथिबाट समेत टोलि आई व्यापक रूपमा अनुसन्धान जारी रहेको छ । लापरवाही र पर्याप्त सुरक्षाको ब्यवस्था नभएकोले उक्त घटना भएको तर कुनै पनि हालतमा अपराधी बच्न नसक्ने प्रहरी निरीक्षक पन्थीले बताए ।
ज्योतिर्लिङ्गेश्वर महादेव ६४ लिंगेश्वर मध्ये ३४ औँ लिंगेश्वरका नाममा चिनिन्छ । यस ठाउँमा माधवनारायण व्रतका व्रतालुहरु शिवरात्रिका दिन जाग्राम बस्दछन् । उक्त दिन जाग्राम बसेपछिमात्रै माधवनारायण व्रतका क्रममा आफूले इच्छाएको पूरा हुने जनबिश्वास रहेको छ ।
उक्त दिन माधवनारायण व्रतका कजी, देवता बोक्ने, साँवागण, गुरुजु पुजारी सहित साँखुको लप्सेफेदी स्थित साधु स्मशानमा गएर पूजाआजा गर्ने चलन रहेको छ । सो पूजा सकिएपछि प्रसाद ग्रहण गरेर राति माधवनारायणको भजन किर्तन गर्दै ज्योतिर्लिङ्गेश्वर परिसरमा जाग्राम बसी भोलिपल्ट बिहानै बज्रयोगिनी माईको दर्शन गर्न जाने प्रचलन रहेको छ ।