२६ असार, काठमाडौं ।

५ करोड रुपैयाँमा बुद्ध धर्मग्रन्थ बिक्री गर्न खाज्ने ६ जनालाई प्रहरीले पक्राउ गरेको छ ।

बुधवार प्रहरीले साढे तीन बजे चन्द्रागिरि नगरपालिका–१५ ढुंङ्गेअड्डाबाट ६ जनालाई पक्राउ गरेको हो। उनीहरूले लामा भाषामा लिखित पुरानो बुद्ध धर्मग्रन्थ पाँच करोडमा बिक्री गर्न लागेका थिए।

पुरातात्विक महत्वको ऐतिहासिक सुनको अक्षरले लेखिएको धार्मिक ग्रन्थको पाना बिक्री गर्न खोज्ने खोटाङका गेहेन्द्रसिंह आत्रय, ओखलढुंगाका सुवासकुमार बस्नेत, हरिबहादुर लामिछाने, काभ्रेका जनक गिरी, काठमाडौंका राजेन्द्रबहादुर जोशी र नुवाकोटका रोशन तामाङलाई पक्राउ गरिएको प्रहरीले जनाएको छ ।

उनीहरुलाई लामा भाषामा लिखित पुरानो बुद्ध धर्म ग्रन्थको १६ पाना ५ करोड रुपैँयामा खरिद बिक्रीको लागि छलफल गरीरहेको अवस्थामा पक्राउ गरेकाे हाे । विशेष सूचनाको आधारमा महानगरीय प्रहरी वृत्त थानकोट र महानगरीय अपराध महाशाखाबाट खटिएको प्रहरीले उनीहरुमध्ये जनक गिरीको साथबाट तिव्वेतीयन लिपिमा सुनौलो अक्षरले लेखिएको उक्त बुद्ध धर्मको पाना बरामद गरेकाे छ ।

उनीहरू उपर प्राचीन स्मारक संरक्षण ऐन, २०१३ बमोजिम थप अनुसन्धान कार्य भइरहेको महानगरीय प्रहरी वृत्त थानकोटले जनाएको छ ।