चाडपर्वको समयमा यात्रुहरूको सुरक्षा सुनिश्चित गर्न मन्त्री दाहालले सडक मर्मत तथा सवारी सुरक्षा व्यवस्थापनका लागि तत्काल कदम चाल्ने निर्देशन दिएका छन्।

काठमाडौँ, २३ भदाै : भौतिक पूर्वाधार तथा यातायात मन्त्री देवेन्द्र दाहालले दसैंअघि नै सडकका खाल्डाखुल्डीहरू पुर्न निर्देशन दिएका छन्। आइतबार मन्त्रालयमा आयोजित सरोकारवालाहरू बीचको छलफलमा मन्त्री दाहालले चाडपर्वको समयमा यात्रुहरूको अत्यधिक चाप हुने र दुर्घटनाको जोखिम बढ्ने हुँदा खाल्डाखुल्डी तत्काल पुर्नुपर्ने आवश्यकता औंल्याए।

मन्त्री दाहालले जोखिमयुक्त स्थानमा सडक सुरक्षाका पूर्वाधारहरू निर्माण तथा मर्मतको लागि निर्देशन दिँदै, सवारी नियम उल्लंघन नियन्त्रण र दुर्घटनापछि उद्धार तथा अस्पताल पुर्‍याउने व्यवस्थाका लागि नेपाल प्रहरीलाई तयारी अवस्थामा रहन आग्रह गरेका छन्।

सडक सुरक्षाको दीर्घकालीन व्यवस्थापनका लागि नीतिगत र कानुनी सुधार ल्याउने प्रतिबद्धता व्यक्त गर्दै, सडक सुरक्षा परिषदलाई प्रभावकारी बनाउन आवश्यक कदम चालिने उनले बताए। साथै, सुरक्षित सडक, दक्ष चालक, चुस्त सवारी साधन र सचेत यात्रुहरूकै सहकार्यबाट मात्र सडक सुरक्षा कायम गर्न सकिने भन्दै तीनै तहका सरकार र सम्बद्ध निकायबीच सहकार्यको खाँचो रहेको धारणा व्यक्त गरे।

मन्त्रालयका सचिव केशवकुमार शर्माले चाडपर्व नजिकिँदै गर्दा सवारी सुरक्षा र दुर्घटना न्यूनीकरणका लागि विशेष ध्यान दिनुपर्नेमा जोड दिए। उनले लामो दूरीका सवारीमा दुई जना चालक अनिवार्य राख्न र सवारी नियमको पालना गराउन आग्रह गरे।