मनाङ : माथिल्लो मनाङमा स्थानीय भाषाशैली र परम्परा संकटमा परिरहेको अवस्थालाई ध्यानमा राख्दै, मनाङी भाषामा तीनवटा गीतको म्युजिक भिडियो छायाङ्कन भइरहेको छ। पल घलेको ‘मनाङ्गे नानी’ र ‘ओे माया ओ’ तथा सोनम गुरुङको ‘आमा’ बोलका गीतहरूमा यो प्रयास समेटिएको छ।

पर्यटन व्यवसायी संघ मनाङका अध्यक्ष विनोद गुरुङले मनाङी भाषाशैली र संस्कृतिलाई जोगाउन म्युजिक भिडियो निर्माण गर्दै रहेको जानकारी दिए। “वृद्धवृद्धाहरूको मृत्यु र युवापुस्ताको विदेशिनाले भाषा र संस्कृति लोप हुने डर छ,” उनले भने।

शब्द र सङ्गीत पल घलेले तयार पारेका छन्, र गायकहरूमा दिका गुरुङ, सोनाम गुरुङ, पल घले, र भ्वाइस अफ नेपाल सिजन ६ की टप ६ प्रतिस्पर्धी इना गुरुङका साथै अन्य स्थानीय कलाकारहरू पनि सामेल छन्।

म्युजिक भिडियोका दृश्य मनाङका ङावल, मनाङ गाउँ र भ्राकालगायतका रमणीय स्थानहरूमा छायाङ्कन भइरहेको छ। यस प्रयासले मनाङको मौलिकता जोगाउन महत्वपूर्ण भूमिका खेल्ने विश्वास गरिएको छ।