काठमाडौं महानगरपालिका वडा नं. १५ भुइखेल, स्वयम्भूमा दिवा भोजनको शुरुवात गरिएको छ ।
१५ नं. वडा, स्थानीय संघसंस्था, क्लब तथा स्वयम् सेवकहरुको सहयोगमा आजबाट २०० जनाको लागि दैनिक भोजनको सुरुवात गरिएको काठमाडौं महानगरपालिका प्रवक्ता एवम् १५ वडाध्यक्ष ईश्वरमान डंगोले बताए ।

‘पहिलो चरणको राहत वितरण सकिएको र दोश्रो चरणको राहत कार्यक्रम सुरु नहुञ्जेलसम्मका लागि यो व्यवस्था गरिएको हो । ’, वडाध्यक्ष डंगोल भन्छन् ‘कोही भोकै बस्न नपरोस् भनेर वडाबाट दिनहुँ छाक टार्न समस्यामा परेकाहरुका लागि आजैबाट २०० जनाका लागि दैनिक भोजनको शुरुवात गरेका छौं ।’

साथै कोरोना कोभिड – १९को संक्रमणलाई न्यूनीकरण गर्न काठमाडौं महानगरपालिका वडा नं. १५ भुइखेल, स्वयम्भूमा १० बेडको क्वारेन्टाइन निर्माण गरिएको छ ।

१५ वडा कार्यालय, नेपाली सेना र नेपाल प्रहरीको संयुक्त पहलमा स्वयम्भूस्थित भुइखेल चौरमा क्वारेन्टाइन निर्माण गरिएको हो ।

डंगोलका अनुसार संक्रमित भइसकेकाहरुलाई नभईकन विदेशबाट आएकाहरुलाई राख्न उक्त १० बेडको क्वारेन्टान्इन निर्माण गरिएको हो । तत्कालै क्वारेन्टाइनमा राख्नुपर्ने स्थिति वडाभित्र नभएपनि भोलीको आवश्यकतालाई ध्यानमा राखी उक्त क्वारेन्टाइन निर्माण भएको छ ।