३१ जेठ, काठमाडौं । कालापानी लिपुलेक र लिम्पियाधुरा समेटिएको नेपालको नक्शा नेपालको संविधानमा संशोधन भई पारित भएको खुशियालीमा आज स्वयम्भू महाचैत्यको प्रांगणमा दीप प्रज्वलन गरिएको छ ।

प्रतिनिधिसभाको आजको बैठकले नेपालको भूमि लिम्पियाधुरा, लिपुलेक र कालापानीसहितको नेपालको नक्सा समेटिएको संविधान संशोधन विधेयक दुई तिहाइभन्दा बढी मतले पारित गरेको छ ।
बैठकमा कानुन, न्याय तथा संसदीय मामिला मन्त्री डा।शिवमाया तुम्बाहाङफेले प्रस्तुत गर्नु भएको लिम्पियाधुरा, लिपुलेक र कालापानी समेटिएको नेपालको नक्सा संविधानको अनुसूचीमा समावेश गर्ने सम्बन्धी नेपालको संविधान (दोस्रो संशोधन) विधेयक–२०७७ दुई तिहाइभन्दा बढी मतले पारित गरेको हो ।

आज स्वयम्भूमा प्रतिनिधि सभा सदस्य जीवनराम श्रेष्ठ, कामपा प्रवक्ता एवं १५ वडा अध्यक्ष ईश्वरमान डंगोलको उपस्थितिमा नेपालको नक्शामा दियो बाली दीप प्रज्वलन गरेका छन् ।

सो अवसरमा कामपा शहरी पूर्वाधार विकास विभागका सदस्य मन राजा रंजित, वडासदस्य मैयाँलक्ष्मी महर्जन, चःमति नेवाः खलःका अध्यक्ष पूर्णकाजी ज्यापु लगायत स्थानीयहरुहरुको उपस्थिति थियो ।

भारतको कब्जामा रहेको लिम्पियाधुरा, लिपुलेक, कालापानीलगायत नेपालको भूभाग समेटिएको नक्शा नेपालको संविधानको अनुसूची ३ मा रहेको निशान छापमा समावेश गर्न ल्याइएको विधेयक पारित भएसँगै देशभर दीप प्रज्वलन गरेका छन् ।