कीर्तिपुरको अमूर्त संस्कृति देवी प्याखँ (देवी नाच) यस वर्ष प्रदर्शन भएको छ ।

कीर्तिपुर नगरपालिका वडा नं. १०, तःननी दाफा खलःद्वारा आयोजित उक्त देवी प्याखँ (देवी नाच) शनिबार सार्वजनिक प्रदर्शन गरिएको हो ।

प्रत्येक वर्षको दशैं/मोहनीको समयमा प्रदर्शन गरिने उक्त नाच अघिल्लो वर्ष कोरोनाका कारण स्थगित गरिएको थियो ।

स्थानीय तःननी टोलमा प्रदर्शन गरिएको देवी प्याखँ कीर्तिपुरको मौलिक देवी प्याखँ हो । यस प्याखँमा इन्द्रायणी, ब्रम्हायणी, भैरव, ख्याः, कवं, पो (दुई जना) र दागिंनीलगायतका पात्रहरू हुने गर्दछ ।

श्रोतको अभावका कारण कीर्तिपुरकै यस मौलिक देवी प्याखँ केही वर्षदेखि रोकिएकोमा यसलाई निरन्तरता दिई संरक्षण गर्ने उद्देश्यका साथ कीर्तिपुर नगरपालिकाले चालु आ.व.मा रु. दश लाखको अक्षय कोषको व्यवस्था गरेको छ ।

यस वर्षको प्याखँ (नाच) आगामी कार्तिक ३ गते अमासी पुन्हि (कोजाग्रत पूर्णिमा)का दिन स्थानीय चिलंच्वमा प्रदर्शन गरिने आयोजक तःननी दाफा खलःले जनाएको छ ।