त्रिभुवन विश्वविद्यालय चिकित्सा शास्त्र अध्ययन संस्थान र आयुर्वेद क्याम्पस तथा शिक्षण अस्पताल कीर्तिपुरले आरोग्य सप्ताह –२०२१ शुरु गरेको छ ।

धन्वन्तरी जयन्ती तथा राष्ट्रिय आरोग्य दिवस २०७८ को उपलक्ष्यमा सो सप्ताह शुरु गरेको हो । आरोग्य सप्ताहको कीर्तिपुर नगरपालिकाका उप–प्रमुख सरस्वती खड्काले उद्घाटन गर्नुभएको थियो । यही कार्तिक १० गते भएको आरोग्य सप्ताह – २०२१ उद्घाटन पश्चात क्याम्पस परिसरमा सरसफाइ तथा वृक्षारोपण गरेको थियो ।

आयुर्वेद क्याम्पसका प्रमुख सह–प्राध्यापक डा. शिवमंगल प्रसादको सभापतित्वमा भएको उद्घाटन कार्यक्रममा विशिष्ट अतिथि आयुर्वेद चिकित्सा परिषद् नेपालका अध्यक्ष डा.सन्तोष कुमार ठाकुर उपस्थित हुनुभएको थियो ।

आरोग्य सप्ताहको क्रममा कार्तिक १२ गते शुक्रबार निःशुल्क स्वास्थ्य शिविर अन्तर्गत मधुमेह परिक्षण एवम् रक्तदान कार्यक्रम शिक्षण अस्पताल परिसरमा भएको थियो भने कार्तिक १४ गते आइतबार अन्तर्राष्ट्रिय वेविनार र कार्तिक १५ गते सोमबार राष्ट्रिय स्तरको पोष्टर प्रतियोगिताको आयोजना गरिएको थियो ।

कार्तिक १६ गते धन्वन्तरी पुजा गरी त्रिभुवन विश्वविद्यालयका उपकुलपति प्रा. डा. धर्मकान्त वास्कोटाको प्रमुख आतिथ्यमा कार्यक्रमको समापन गरिने जानकारी दिइएको छ ।