कीर्तिपुर नगरपालिकाले ६ नं. वडामा सञ्चालित विभिन्न याेजनाहरूकाे पहिलाे किस्ता सम्बन्धित क्षेत्रमै चेक हस्तान्तरण भएकाे छ । नगर प्रमुख रमेश महर्जन र उप–प्रमुख सरस्वती खड्काको उपस्थितिमा २२ गते बुधबार वडाअध्यक्ष न्हुच्छेबहादुर महर्जनले कटुवाल वस्तिमा निर्माण गर्न लागेको चोभार खोप केन्द्रको लागि पहिलो किस्ता रू. १ लाख ३२ हजारको चेक हस्तान्तरण गर्नुभएकाे हाे ।

कीर्तिपुर नगरपालिकाले केही समय अघिदेखि कुनै पनि योजनको पहिलो किस्ता सम्बन्धित क्षेत्रमै गएर हस्तान्तरण गर्दैआइरहेको हाे । उपभोक्ता समितिहरूलाई सजिलोको लागि र योजना समयमै सम्पन्न गर्ने थप दायित्व बोध गराउने उद्देश्यले कीर्तिपुर नगरपालिकाले सम्बन्धित क्षेत्रमै गएर पहिलो किस्ताको चेक हस्तान्तरण गर्ने कार्यको थालनी गरेको हो ।

त्यसै गरी महत गाउँ मोटर बाटो निर्माण योजनाको पहिलो किस्ता रू. १ लाखको चेक पनि सम्बन्धित स्थानमै हस्तान्तरण गर्नुभयो । उपभोक्ता समितिका अध्यक्ष श्याम महर्जनलाई सो चेक वडा अध्यक्ष महर्जनले हस्तान्तरण गर्नुभएको थियो ।