काठमाडाैं, २० भदाै: काठमाडौँ महानगरपालिकाले सहकारी संस्थासँग सम्बन्धित उजुरी तथा गुनासाहरू दर्ता गर्न सबै वडा कार्यालयलाई निर्देशन दिएको छ। पछिल्लो समय बचतकर्ताहरूले बचत रकम फिर्ता माग सम्बन्धी गुनासो बढ्दै गएपछि महानगरले यस्तो निर्देशन जारी गरेको हो। महानगरका अनुसार काठमाडौँ महानगरपालिका सहकारी नियमावली, २०८० को नियम १६ अनुसार सहकारी संस्थाले सदस्यको बचत रकम मागेको बखत व्याजसहित तुरुन्त फिर्ता दिनुपर्ने व्यवस्था छ।

महानगरले एक औपचारिक सूचनामा भनेको छ, ‘यसै सम्बन्धमा बचत रकम फिर्ता माग सम्बन्धी बचतकर्ताको गुनासो दिनानुदिन बढ्दै गएकाले त्यहाँ वडा क्षेत्रभित्र सञ्चालित काठमाडौँ महानगरपालिकाको क्षेत्राधिकारभित्र पर्ने सहकारी संस्थाहरूबाट बचत रकम फिर्ता माग गरिएको उजुरी तथा गुनासो देहायका कागजातसहित दर्ता गरी यसैसाथ संलग्न ढाँचाको पत्र संस्थालाई जारी गरिदिनु हुन अनुरोध छ।’

यस निर्देशनसँगै वडा कार्यालयहरूले अब सहकारी संस्थाहरूमा भएका उजुरीहरूको विवरण संकलन गर्ने र समाधानका लागि आवश्यक कदम चाल्ने जिम्मेवारी पाएका छन्।

काठमाडौँ महानगरको यो निर्णयले बचतकर्ताको हित र सहकारी संस्थाहरूको पारदर्शिता सुनिश्चित गर्न महत्त्वपूर्ण योगदान गर्ने अपेक्षा गरिएको छ।