नेपाल–भारत पेट्रोलियम पाइपलाइन सञ्चालनमा आएको छ वर्षमा साढे छ अर्ब लिटरभन्दा बढी इन्धन आयात भएको छ । भारतको मोतिहारीदेखि नेपालको अमलेखगञ्जसम्मको पाइपलाइनबाट हालसम्म ६ अर्ब ३४ करोड ९२ लाख लिटर पेट्रोलियम पदार्थ आएको नेपाल आयल निगमको मधेस प्रादेशिक कार्यालयले जनाएको छ ।

पाइपलाइनमार्फत ६ अर्ब १४ करोड ३५ लाख लिटर डिजेल, २० करोड १५ लाख लिटर पेट्रोल र ४१ लाख लिटर मट्टितेल आयात भएको प्रादेशिक प्रमुख प्रलयङ्कर आचार्यले जानकारी दिनुभयो । विसं २०७६ भदौ २४ गते तत्कालीन प्रधानमन्त्री केपी शर्मा ओली र भारतीय समकक्षी नरेन्द्र मोदीले परियोजनाको उद्घाटन गरेका थिए ।

पाइपलाइनले नेपालका करिब ७० प्रतिशत इन्धन माग पूरा गरिरहेको छ । अमलेखगञ्ज डिपोबाट काठमाडौँ, पोखरा, विराटनगर, भैरहवा, जनकपुरलगायतका सहरमा आपूर्ति हुँदै आएको छ । यस डिपोमा हाल ९४ हजार किलोलिटर इन्धन भण्डारण गर्न सकिन्छ ।

पाइपलाइन सञ्चालनपछि सडक मार्गमा ढुवानी जोखिम घट्नुका साथै वार्षिक करिब रु तीन अर्ब ढुवानी खर्च बचत भएको निगमले जनाएको छ । प्रमुख आचार्यका अनुसार इन्धन चोरी, मिसावट र वातावरणीय असर पनि न्यून भएको छ ।

अब अमलेखगञ्ज–लोथर विस्तार परियोजना सुरु गरिएको छ । करिब १४ अर्ब ९ करोड लागतमा ६२ किलोमिटर लामो पाइपलाइन र अत्याधुनिक ‘ग्रीन फिल्ड टर्मिनल’ निर्माण गरिँदैछ । सो परियोजना तीन वर्षभित्र सम्पन्न गर्ने लक्ष्य राखिएको छ ।