काठमाडौं, भदौ २१ — पारालिम्पिकमा ऐतिहासिक सफलता हात पारेकी पलेशा गोवर्धनलाई पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सम्मान गरेका छन्। खुलमटारमा आयोजित कार्यक्रममा पलेशासँगै उनका प्रशिक्षक कविराज नेगी लामा, व्यवस्थापक रामचन्द्र श्रेष्ठ र पलेशाका पिता प्रदीप गोवर्धनलाई पनि सम्मान गरियो।

अध्यक्ष दाहालले नेपालका लागि ओलम्पिकमा पहिलो पटक पदक जितेको यो क्षणलाई ऐतिहासिक भन्दै पलेशाले सिंगो राष्ट्रलाई गर्व गर्न दिएको बताए। उनले भने, “खेल क्षेत्रमा यत्रो ठूलो सफलता पाउनु सामान्य कुरा होइन। पलेशाको यो जितले विश्वभर रहेका नेपालीलाई गौरवान्वित बनाएको छ।”

खेलकुदले राष्ट्रिय एकता, समृद्धि र अन्तर्राष्ट्रिय कूटनीतिको प्रवर्द्धनमा महत्त्वपूर्ण भूमिका खेल्ने बताउँदै दाहालले खेल क्षेत्रमा राज्यले थप लगानी गर्नुपर्नेमा जोड दिए। “खेलको माध्यमबाट अहिले राष्ट्रले गर्व गर्ने अवसर पाएको छ,” उनले भने।

कार्यक्रममा पलेशाले कास्य पदक प्राप्त गर्दाको अनुभव सुनाउँदै आगामी ओलम्पिकमा स्वर्ण पदक जित्ने लक्ष्य राखेको बताइन्। प्रशिक्षक कविराज नेगी लामाले पलेशाको मेहनत र समर्पणले देशलाई गौरवान्वित बनाएको बताए।

सो अवसरमा नेपाल तेक्वान्दो संघका अध्यक्ष प्रकाशशमशेर राणा, महासचिव दीपराज गुरुङ र राष्ट्रिय खेलकुद परिषदका सदस्यसचिव टङ्कलाल घिसिङ लगायतले पनि आफ्नो धारणा राखेका थिए।