काठमाडौं : भुटानी नरेश जिग्मे खेसर नाम्गेल वाङचुकले मंगलबार काठमाडौंका दुई प्रमुख धार्मिक सम्पदा क्षेत्र स्वयम्भूनाथ र बौद्धनाथको दर्शन गरेका छन्।

नरेशले बिहान स्वयम्भूनाथमा पूजा–अर्चना गरेका हुन्। स्वयम्भू व्यवस्थापन तथा संरक्षण महासमितिका पदाधिकारीहरूले उनलाई परिसरमै स्वागत गरेका थिए। करिब आधा घण्टा स्वयम्भूमा बिताउँदै उनले त्यहाँबाट उपत्यकाको दृश्यावलोकन गरेका थिए।

त्यसपछि उनले बौद्धनाथको पनि दर्शन गरे। नरेश भारतबाट स्वदेश फर्किने क्रममा मंगलबार बिहान काठमाडौं आइपुगेका हुन्।

परराष्ट्र मन्त्रालयका अनुसार नरेश वाङचुकले काठमाडौंका धार्मिक सम्पदाको भ्रमण गरेपछि मंगलबार नै स्वदेश फर्किने कार्यक्रम छ।

भुटानी नरेशको यो भ्रमण नेपाल–भुटान सम्बन्ध सुदृढ बनाउन र सांस्कृतिक आदान–प्रदानका लागि प्रतीकात्मक रूपमा महत्वपूर्ण मानिएको छ।