‘जेनजी’ आन्दोलनका अगुवा मिराज ढुङ्गाना नेतृत्वको समूहले प्रत्यक्ष कार्यकारीको ‘बटमलाइन’ पूरा नभएसम्म निर्वाचनमा भाग नलिने निर्णय गरेको छ।

आज नयाँ बानेश्वरमा पत्रकार सम्मेलनमार्फत ढुङ्गानाले प्रत्यक्ष कार्यकारी शासकीय स्वरुप र विदेशमा रहेका नेपाली नागरिकलाई मतदानको व्यवस्था हुनु पर्ने बताए। भ्रष्टाचार नियन्त्रणका लागि नागरिकस्तरीय छानबिन समिति गठन र आर्थिक रुपान्तरणको स्पष्ट नीति अख्तियार गर्नुपर्ने पनि उनले जोड दिए।

समूहले जेनजी प्रदर्शनलाई दिशाहीन हुन नदिन राजनीतिक दल गठन गर्ने निष्कर्षमा पुगेको र पार्टीको नामबारे सुझाव संकलन भइरहेको जानकारी दिइयो।

ढुङ्गानाले भने, “देश विकासमा सामूहिक प्रतिबद्धता र सहकार्य आवश्यक छ। रोजगारी सिर्जना, बन्द कलकारखाना सञ्चालन र पर्यटन क्षेत्रको प्रवर्द्धन गर्न सरकार जिम्मेवार हुनुपर्छ।”