बेइजिङ । चीनमा जेनेरेटिभ कृत्रिम बौद्धिकता (एआई) प्रविधिको प्रयोग तीव्र गतिमा बढ्दै गएको छ । चीन इन्टरनेट सञ्जाल सूचना केन्द्र (सिएनएनआइसी) द्वारा सार्वजनिक प्रतिवेदनअनुसार सन् २०२५ को जुन महिनासम्म ५० करोडभन्दा बढी मानिसले यो प्रविधि प्रयोग गरिरहेका छन् ।

पछिल्ला छ महिनाभित्र मात्रै करिब २६ करोड ६० लाख नयाँ प्रयोगकर्ता थपिएका छन् । सन् २०२४ को अन्त्यमा २४ करोड ९० लाख प्रयोगकर्ता रहेका भने अहिले यो सङ्ख्या बढेर ५१ करोड ५० लाख पुगेको हो ।

प्रतिवेदनले चीनमा जेनेरेटिभ एआई प्रविधिको प्रयोग दर ३६.५ प्रतिशत पुगेको जनाएको छ । यसले प्रविधिप्रति जनचासो र पहुँच द्रुत रूपमा फैलिएको सङ्केत गर्छ ।

विशेषज्ञहरूका अनुसार, जेनेरेटिभ एआई प्रविधिले शिक्षा, व्यापार, सञ्चार र मनोरञ्जनलगायत विभिन्न क्षेत्रमा उल्लेखनीय परिवर्तन ल्याइरहेको छ ।
— रासस/सिन्ह्वा