जिल्ला प्रशासन कार्यालय काठमाडौँले दिपावलीमा राति ९ बजेपछि देउसीभैली नगर्न आग्रह गरेको छ । सार्वजनिक सूचनामार्फत प्रशासनले देउसीभैलो मर्यादित र अनुशासित ढङ्गले बेलुकी ९ बजेसम्म मात्र खेल्न अनुरोध गरेको हो ।

कार्यालयले आतिसबाजी, पटाका, भुइँचम्पाजस्ता विष्फोटक पदार्थको प्रयोग, खरिद–बिक्री र ढुवानी नगर्न चेतावनी दिएको छ । साथै सार्वजनिक सडक, पदमार्ग वा खुला ठाउँमा आवागमन रोक्ने गरी मण्डप वा दीपावली थल नबनाउन पनि निर्देशन दिएको छ ।

चाडपर्वमा चोरी तथा ठगीका घटना बढ्ने भएकाले घर र सम्पत्तिको सुरक्षा गर्न, शंकास्पद व्यक्ति देखिएमा प्रहरीलाई खबर गर्न प्रशासनले सबैलाई सतर्क रहन आग्रह गरेको छ ।

यस्तै, कालोबजारी, मूल्यवृद्धि, अवैध चिठ्ठा–जुवातास र अनलाइन ठगीजस्ता कार्य नगर्न र सवारीसाधनमा ट्राफिक नियम पालना गर्न समेत प्रशासनले ध्यानाकर्षण गराएको छ ।