काठमाडौँ । तिहारको समयमा सवारी दुर्घटना न्यूनीकरणका लागि ट्राफिक प्रहरीले काठमाडौँ उपत्यकाभर मादक पदार्थ सेवन (मापसे) विरुद्ध विशेष अभियान सञ्चालन गरेको छ ।

उपत्यका प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक दानबहादुर कार्कीको निर्देशनमा आज बिहानदेखि रातिसम्म मुख्य चोक, सडक र गल्लीमा मापसे परीक्षण कडाइका साथ गरिएको छ ।

प्रहरीका अनुसार अभियानको उद्देश्य दण्ड होइन, चेतना जगाउने रहेको छ । कार्कीकाे भनाइमा नागरिकले सुरक्षाको जिम्मेवारी आफैं लिनु पर्ने सन्देशसहित प्रहरी सडकमा खटिएको हो ।

उपत्यका ट्राफिक प्रहरी प्रमुख प्रहरी वरिष्ठ उपरीक्षक नवराज अधिकारी टोलीसहित त्रिपुरेश्वर, नयाँवानेश्वर, कलङ्की, दरबारमार्ग, महाराजगञ्ज, गौशाला, चाबहिल र बल्खु क्षेत्रमा अनुगमनमा खटिएको जानकारी दिइएको छ ।

भाइटीकाको दिन सयौँ सवारीसाधनका चालकको मापसे परीक्षण गरिएको र सचेतनामूलक कार्यक्रम पनि सञ्चालन गरिएको अधिकारीले बताएका छन् ।

प्रहरीका अनुसार दसैँ, तिहारजस्ता पर्वमा मादक पदार्थ सेवन गरी सवारीसाधन चलाउने प्रवृत्ति रोक्न यस वर्ष थप कडाइ गरिएको छ ।