काठमाडौं, काठमाडौं महानगरपालिकाका मेयर बालेन साह नगर सभा बैठकमा सहभागी नभइ गायब भएका छन् । मेयर साह आफैले शुक्रबारको लागि बोलाएको नगर सभा बैठकमा नआएका हुन् । आफैले बोलाएको बैठकमा मेयर नआएपछि नगरसभाका सदस्यहरुले ‘मेयर हराएको’ सूचना निकाल्नु पर्ने टिप्पणी गरिराखेका छन् ।

मेयर साह आफूले ल्याएको नीति तथा कार्यक्रम पारित नहुने देखिएर बैठकमै नआएको हो । साहले ल्याएको नीति तथा कार्यक्रमलाई असार १० को नगर सभा बैठकले नै अस्वीकृति गरिदिएको थियो । त्यसबेला एमालेबाट जितेर आएका वडा नं. ३२ का अध्यक्ष नवराज पराजुली, कांग्रेसबाट जितेर आएको वडा १७ का अध्यक्ष नवीन मानन्धर र एकीकृत समाजबादीबाट जितेर आएको वडा १५ का अध्यक्ष ईश्वरमान डंगोलले संयुक्त रुपमा नीति तथा कार्यक्रममा संशोधन हालेका थिए । तर मेयर शाहले जर्बजस्ती नीति तथा कार्यक्रम पारित गर्न खोजेपछि सभामै विरोध भएको थियो । त्यसपछि मेयर शाहले नीति तथा कार्यक्रम पारित नगरि बजेट ल्याउन दिएका थिए ।

शुक्रबारको बैठकमा पनि संशोधन नगरि नीति तथा कार्यक्रम पारित नहुने छाँटकाँट देखिएपछि मेयर गायब भएका हुन् । उनी नगर सभा बस्ने तोकिएको स्थान राष्ट्रिय सभागृहमा समेत आएका छैनन् ।

नगरसभाका सदस्यहरुले आज पनि संशोधन प्रस्ताव पारित नगरि नीति तथा कार्यक्रम पारित नगर्ने तयारी गरेका थिए । यो थाहा पाएपछि मेयर साह नगरसभा ‘फेस’ गर्न समेत डराएको नगरसभा सदस्यहरुले बताएका छन् ।

मेयर नआएपछि नगरसभामा आएको वडा अध्यक्ष, वडा सदस्यहरु धमाधम फर्किन थालेको छ ।