जिल्ला प्रशासन कार्यालय काठमाडौँले राजधानीका विभिन्न क्षेत्रलाई दुई महिनाका लागि भेला, धर्ना, जुलुस र प्रदर्शन निषेध क्षेत्र घोषणा गरेको छ ।

प्रमुख जिल्ला अधिकारी ईश्वरराज पौडेलद्वारा शुक्रबार जारी आदेशअनुसार पाँच जनाभन्दा बढी व्यक्ति भेला भई कुनै पनि विरोध कार्यक्रम गर्न नपाइने भएको हो । प्रशासनले भीडबाट तोडफोड, आगजनी वा अशान्ति हुने सम्भावना रहेको भन्दै यस्तो कदम चालेको जनाएको छ ।

स्थानीय प्रशासन ऐन, २०२८ अनुसार जारी आदेशले राष्ट्रपति कार्यालय शीतल निवास, सिंहदरबार, बालुवाटार, लैनचौर, नारायणहिटी दरबार संग्रहालय क्षेत्रलगायत स्थानहरूमा कुनै पनि प्रकारका प्रदर्शन, धर्ना वा सभामा रोक लगाएको छ ।

सिंहदरबारको चारै दिशासँगै प्रधानमन्त्री, उपराष्ट्रपति र राष्ट्रियसभा अध्यक्षका निवास आसपासका क्षेत्र, महालेखा परीक्षक कार्यालय, सर्वोच्च अदालत र पुरातत्व विभागअगाडिसम्म पनि निषेध लागू गरिएको छ ।

यो आदेश आजदेखि लागू भई दुई महिनासम्म कायम रहने प्रशासनले जनाएको छ ।