चितवन । देशभर बिरामी र रक्तदाताबीच समन्वय गर्दै ब्लड डोनर्स सोसाइटी नेपालले रगत आपूर्तिमा सहजीकरण गरिरहेको छ । चितवनका स्वयंसेवी रक्तदाताले स्थापना गरेको यस संस्थाले काठमाडौँ, चितवन र झापा लगायत मुख्य सहरमा शाखा विस्तार गरेको जानकारी दिइएको छ ।

सोसाइटीका अध्यक्ष अर्जुन अधिकारीका अनुसार कास्की, नवलपुर, मकवानपुर, पर्सा, बाँके र रूपन्देहीमा पनि प्रतिनिधि सक्रिय रहेका छन् । संस्थाले युवा र नयाँ रक्तदातालाई उत्प्रेरित गर्दै रगत अभाव नहोस् भन्ने उद्देश्यका साथ नियमित अभियान सञ्चालन गरिरहेको अधिकारीले बताए ।

उनका अनुसार देशभर नेपाल रेडक्रस सोसाइटी र ठूला अस्पतालहरूले रगत सङ्कलन र वितरण गर्दै आएका छन् भने, ती संस्थाबाट रगत नपरेका बिरामीका लागि सोसाइटीले सहजीकरण गर्ने गरेको छ । “रगतको अभावले कसैको उपचार रोकियोस् भन्ने हाम्रो उद्देश्य होइन,” अध्यक्ष अधिकारीले बताए ।

हाल सोसाइटीको नेटवर्कमा १० हजारभन्दा बढी रक्तदाता आवद्ध छन् । सामाजिक सञ्जालमार्फत रक्तसमूह सार्वजनिक गरेर आह्वान गरेपछि रक्तदाता स्वेच्छिक रूपमा सहभागी हुने गरेको अधिकारीले जानकारी दिए । सोसाइटीले एकै दिन १ हजार ७०० युनिट रगत सङ्कलन गरेर राष्ट्रिय रेकर्ड समेत कायम गरेको छ ।

प्रादेशिक रक्तसञ्चार केन्द्र भरतपुरका प्रमुख रमेशकान्त पौडेलले सोसाइटीले बिरामीका लागि रगत आपूर्तिमा महत्त्वपूर्ण भूमिका निर्वाह गरेको बताए । त्यस्तै, चितवन मेडिकल कलेजका प्रमुख प्रशासक प्रताप देवकोटाले सोसाइटी स्थापना भएपछि रगत अभावका कारण बिरामीको उपचार रोक्नुपर्ने अवस्था नरहेको बताए ।

कोरोना महामारीका समयमा रगतको चरम अभाव भएपछि जिल्लाका स्वयंसेवी रक्तदाताले ब्लड डोनर्स सोसाइटी नेपाल स्थापना गरेका थिए । संस्थाले सामाजिक सञ्जालमार्फत युवालाई रक्तदानमा उत्प्रेरित गर्दै आएको छ । सक्रिय सामाजिक योगदानका कारण सोसाइटीले राष्ट्रिय तथा अन्तर्राष्ट्रिय सम्मान प्राप्त गरेको जनाएको छ ।