काठमाडौँ महानगरपालिका–१३ का पूर्व वडा सदस्य तथा समाजसेवी दिलबहादुर मानन्धरको ८६ वर्षको उमेरमा सोमबार बिहान मनमोहन अस्पतालमा उपचारका क्रममा निधन भएको छ ।

एक महिना अघि मात्र उनको प्रोस्टेट रोगको शल्यक्रिया गरिएको थियो । शल्यक्रियापछि घर फर्किए पनि पछिल्ला केही दिनदेखि अस्वस्थ भई अस्पतालमा उपचाररत रहेका थिए ।

उनको अन्त्येष्टि काठमाडौँ महानगरपालिका–१२ स्थित टेकुमा सम्पन्न भएको छ । उनका तीन छोरा र एक छोरी छन् ।

स्वर्गीय मानन्धर २०५४ सालमा काठमाडौँ महानगरपालिका–१३ का निर्वाचित वडा सदस्यका रूपमा स्थानीय नेतृत्वमा निर्वाचित भएका थिए । उहाँ वडाभित्रका विभिन्न संस्थाहरूको संयुक्त संस्था ‘हाम्रो समाज’ का अध्यक्ष समेत रहेका थिए ।

मानन्धरले आफ्ना पत्नीकाे नाममा स्थापना गरिएको ‘गणेशदेवी फाउन्डेसन’ मार्फत नेपालभाषा र साहित्य क्षेत्रमा योगदान पुर्‍याउने व्यक्तिहरूलाई सम्मान गर्दै आएका थिए । स्थानीय समुदायले उनलाई निष्ठावान्, कर्मनिष्ठ र सहयोगी समाजसेवीका रूपमा स्मरण गरेका छन् ।