मेट्राेन्यूज / काठमाडाैं, साउन ७।

पर्यटकीय गन्तव्य पोखरास्थित फेवातालमा डुङ्गा सञ्चालनमा आएको छ ।

कोरोना भाइरसका कारण गरिएको निषेधाज्ञाले गत वैशाख १४ गतेदेखि बन्द भएको डुङ्गा व्यवसाय सोमबारदेखि फेरी सञ्चालनमा आएका छन् ।

पुनः व्यवसाय शुरु भएपछि डुङ्गा चलाएर जीविकोपार्जन गर्दै आएका मजदुर खुशी भएका छन् । 

फेवा डुङ्गा व्यवसायी समितिले यात्रुलाई मास्क अनिवार्य गरिएको छ भने भिडभाड हुन नदिन २० फुटे डुङ्गामा चार र १८ फुटेमा तीन जना राखेर सञ्चालन गरिएको छ ।

यात्रुको चाप न्यून रहेकाले अहिले दैनिक आठदेखि नौ डुङ्गा मात्र सञ्चालनमा रहेकाे समितिले जनाएकाे छ ।

तालमा डुङ्गा सञ्चालन भए पनि प्रसिद्ध तालबाराही मन्दिर भने खुलेको छैन । मन्दिरमा दैनिक साँझमा गरिने आरतीसमेत अहिले बन्द छ ।

डुङ्गा चढ्ने पर्यटकलाई मन्दिर घुमाएर ल्याउने गरिएको छ । फेवातालमा ७६४ डुङ्गा रहेकामा बाराहीघाटमा मात्र ३०० छन् ।

निषेधाज्ञा जारी रहेको र पर्यटन व्यवसाय अहिले पनि ठप्प रहेकाले पर्यटक आवागमन नभएकाले क्यु प्रणालीमा थोरै मात्रामा डुङ्गा सञ्चालनमा ल्याइएको समितिले जनाएको छ ।