कीर्तिपुर । स्थानीय भाषा, लिपी र संस्कृतिको जगेर्ना स्थानीय सरकारको दायित्व भएको काठमाडौँ महानगरका मेयर विद्यासुन्दर शाक्यको भनाइ छ । आज कीर्तिपुरको पाँगा लाछिमा आयोजना गरिएको १२ औँ नेवा एकता दिवसको कार्यक्रममा बोल्दै उहाँले यस्तो बताउनुभएको हो ।

त्यस अवसरमा मेयर शाक्य, कीर्तिपुर नगरका मेयर रमेश महर्जन र टोखा नगरका मेयर प्रकाश अधिकारीलाई सम्मान गरिएको थियो । नेवार समुदायको पहिचानलाई संरक्षण र प्रवर्धन तथा उत्थानमा योगदान पु¥याएकोले उहाँहरुलाई सम्मान गरिएको हो ।

कार्यक्रममा बोल्नुहुँदै मेयर शाक्यले मूर्त अमूर्त सम्पदा संरक्षण, भाषा, लिपी तथा मौलिकता जोगाउन उपत्यकामा भएका भएका क्षेत्रगत प्रयासहरुबाट समष्टिगत रुपमा ठूलो उपलब्धी हासिल भएको उल्लेख गर्नुभयो ।

प्रमुख शाक्यले गैर नेवाःहरूले नेवाःहरूलाइ लडाइ फाइदा लिइरहेकाे बताउँदै सवैभन्दा बढी सम्पदा संरक्षण गर्नुपर्छ भनेर काम कारवाही बढाइरहँदा सम्पदा विरोधी भनेर विभिन्न मुद्दा हालेर काममा बाधा हालेकाे उल्लेख गर्नुभयाे ।

‘काठमाडौँ महानगरले मठ मन्दिर, महाविहार, चैत्य, बहाल, ननी, क्वापाद्यः, ढुङ्गेधारा, गुठीघर निर्माण गर्न राज्यकातर्फबाट लगानी गरेको छ । जीवित देवी कुमारी, किला घः र मखनकी कुमारीलाई भत्ता उपलब्ध गराउँदै आएको छ’, मेयर शाक्यले भन्नुभयो, ‘बाजा संरक्षण र गुरुहरुलाई परम्परागत काम गर्नका लागि वार्षिक भत्ताको व्यवस्था गरेको छ । यसबाट परम्परा जोगाउन समुदाय स्तरमा प्रोत्साहन हुने हाम्रो विश्वाश हो ।’

‘रकम कति हो भन्दा पनि राज्यको उपस्थिति छ कि छैन भन्ने कुरा बढी महत्वपूर्ण हुन्छ । यसमा सबैको साथ छ । महानगरले जारी गरेको पाठ्यक्रम निर्माण तथा कार्यान्वयनमा नेवार समुदायसँगै गैर नेवार समुदाय र राजनीतिक तहबाट पनि सहयोग भएको छ । सबैको सहयोगले राखिएको जग बलियो बनाउनु सबैको जिम्मेवारी हो’, मेयर शाक्यले भन्नुभयो ।

कार्यक्रममा कीर्तिपुर नगरका प्रमुख महर्जनले मूर्त अमूर्त सम्पदा बचाउने कामलाई आफूले प्राथमिकता दिएको उल्लेख गर्नुभयो । समुदाय र सरोकारवालाको सहयोगबाट सम्पदा बचाउन अघि सारिएका धेरै कामहरु सफल भएकाे उहाँले बताउनुभयाे ।

उपत्यका नेवार समुदायको भाषा, लिपी, कला, शिल्पी र साहित्यले धनी छ । यसलाई जोगाउनु हरेक नगर प्रमुखको जिम्मेवारी हो । टोखा नगरका मेयर अधिकारीले भन्नुभयो, ‘मौलिकताका सवालमा फराकिलो सोच राख्नुपर्छ । हामीले नेवारीपन जोगाउन धेरै काम गरेका छौँ ।’

स्थानीय सरकारका कार्यक्रमले जातीय उत्थानका क्षेत्रमा योगदान पुगेको छ । कार्यक्रममा नेवाः देय् दवूका अध्यक्ष नरेशकुमार ताम्राकारले स्थानीय सरकारका कार्यक्रमले समुदाय स्तरमा सकारात्मक प्रभाव देखिएको उल्लेख गर्नुभयो ।

गएको बर्ष ललितपुरकाे आदिभूमि खाेकनामा कार्यक्रम गरिएको थियो । आगामी बर्ष चन्द्रागिरी नगरमा हुनेछ ।

थप तस्बिरहरूकाे लागि :-